९ वर्षाच्या मुलाच्या 'हुशारीने' पोलिसांची उडवली झोप

पुणे:

सध्याची लहान मुले खूपच हुशार आहेत असे म्हटले जाते. मोबाईल, कॉम्प्युटर समजून घेणे असो किंवा चित्रपटातील संवाद पाठांतर असो...हल्लीची मुले खूप लवकर आत्मसात करतात. मात्र, अशाच एका 'हुशार' मुलामुळे पोलिसांची झोप उडाली.

आई रागवू नये म्हणून एका ९ वर्षाच्या मुलाने अशी कथा रचली की पोलिसांनाही त्याच्यावर विश्वास ठेवावा लागला. मात्र, सत्य समोर आले तेव्हा कपाळावर हात मारुन घेण्याशिवाय पर्याय उरला नाही. औषधे आणण्यासाठी आईने नऊ वर्षाच्या मुलाला मेडिकल स्टोअरमध्ये पाठवले. मात्र, तो मित्रासोबत फटाक्यांची आतषबाजी बघत बसला. यात किती वेळ गेला ह्याचा अंदाज त्या लहानग्याला आला नाही. आता, घरी जाण्यास उशीर झाल्यामुळे आईच्या रागातून वाचण्यासाठी त्याने एक कथा रचली. मास्क घातलेल्या एका व्यक्तीने अपहरणाचा प्रयत्न केला. त्याच्या तावडीतून कसा-बसा सुटून आल्याचे त्याने घरी सांगितले.

घाबरलेल्या घरातील मंडळींनी पोलिसांत धाव घेतली. या प्रकाराची माहिती सिंहगड रोड पोलिसांना मिळताच त्यांनी रात्रभर जागून कसून तपास केला. मात्र, काहीच माग लागत नसल्यामुळे पोलीस हैराण झाले. अखेर पोलिसांनी मुलाकडेच चौकशी केल्यानंतर त्याने घरी येण्यास उशीर झाल्यामुळे बनाव रचल्याचे कबुल केले. पण, त्याच्या या कथाकथनामुळे सिंहगड रोड पोलिसांची मात्र, रात्रभर झोप उडाली होती.