मित्रासह लावलेली पैज अंगलट
म. टा. प्रतिनिधी, पुणे
भिडे पुलावरून मुठा नदीत उडी मारलेल्या दोन मित्रांपैकी एकजण वाहून गेल्याची घटना रविवारी सायंकाळी घडली. दुसरा तरुण बाहेर पोहत निघाल्यानंतर हा सर्व प्रकार समोर आला. पाण्याचा वेग जास्त असल्यामुळे वाहून गेलेल्याचा अद्याप शोध लागलेला नाही. दोघांनी पुलावर फोटो काढल्यानंतर पैज लावून नदीत उड्या मारल्याचे चौकशीत समोर आले आहे. याप्रकरणी डेक्कन पोलिस ठाण्यात घटनेची नोंद करण्यात आली आहे.
प्रकाशसिंह श्रीभवन बोहरा (वय २०, रा. नारायण पेठ, मूळ रा. उत्तराखंड) असे वाहून गेलेल्याचे नाव आहे. प्रकाशसिंह कामानिमित्त पुण्यात आला आहे. पोलिसांनी दिलेल्या माहितीनुसार, तो आणि त्याचा मित्र असिम उकील नारायण पेठेतील हॉटेलमध्ये काम करतात. रविवारी सायंकाळी ते मुठा नदीतील पाणी पाहण्यासाठी आले होते. त्यांनी भिडे पुलावर बसून फोटो काढले. शहराला पाणीपुरवठा करणारी धरणे पूर्ण क्षमतेने भरल्यामुळे सध्या मुठा नदीत मोठ्या प्रमाणात पाणी सोडण्यात येत आहे. भिडे पुलाला सायंकाळी पाण्याने स्पर्श केला. फोटो काढल्यानंतर डेक्कन जिमखान्याकडील भागातून सायंकाळी पाचच्या सुमारास दोघांनी मुठा नदीत उड्या मारल्या. असिम पोहत बाहेर आला. मात्र, , प्रकाशसिंह काही बाहेर आला नाही. तो दिसत नसल्याने मित्राने आरडाओरड केली. त्या वेळी भिडे पुलावर असलेल्या नागरिकांनी तत्काळ घटनेची माहिती पोलिस आणि अग्निशमन दलाला दिली. अग्निशमन दल आणि पोलिसांनी तत्काळ घटनास्थळी धाव घेतली. अग्निशमन दलाच्या जवानांनी प्रकाशसिंहचा शोध घेण्याचा प्रयत्न केला असता, पाण्याचा वेग जास्त असल्यामुळे तो सापडला नाही. सोमवारी त्याचा पुन्हा शोध घेण्यात येणार आहे. या घटनेनंतर भिडे पुलावर बघ्यांची गर्दी झाली होती.
काही दिवसांपूर्वी मुठा नदीत मोठ्या प्रमाणात पाणी सोडल्यानंतर टिळक पुलावरूनही दोन तरुणांनी उड्या मारल्या होत्या. त्या वेळी एक तरुण वाहून गेला होता. त्याचा मृतदेह पंधरा दिवसानंतर संगमवाडी येथील बेटात मिळाला होता.