म. टा. प्रतिनिधी, पुणे भारतीय विज्ञान शिक्षण आणि संशोधन संस्थेत (आयसर) शिक्षण घेत असलेला विकास कुमार हिमांशू (वय २३) हा विद्यार्थी गेल्या दहा दिवसांपासून बेपत्ता आहे. या प्रकरणी चतु:शृंगी पोलिस ठाण्यामध्ये तक्रार देण्यात आली आहे. हिमांशू 'आयसर'मध्ये गणित विषयात बीएस एमएस अभ्यासक्रमाच्या चौथ्या वर्षात शिकत आहे. तो मूळचा झारखंडचा असून हुशार विद्यार्थी अशी त्याची ओळख आहे. गेल्या १६ फेब्रुवारीला त्याला संस्थेच्या आवारात शेवटचे पाहिले असल्याची माहिती त्याच्या मित्रपरिवाराने दिली. त्याची परीक्षा सुरू होती. सलग दोन दिवस तो परीक्षेसाठी गैरहजर राहिल्याने तो नक्की कुठे गेला, हा प्रश्न त्याच्या मित्रांना पडला. त्यानंतर त्यांनी संस्थेच्या वरिष्ठ अधिकाऱ्यांना आणि प्राध्यापकांना हिमांशू बेपत्ता असल्याची माहिती दिली. त्यानंतर संस्थेच्या वतीने चतु:शृंगी पोलिस ठाण्यात हिमांशू बेपत्ता झाल्याची तक्रार १९ फेब्रुवारीला नोंदविण्यात आली. 'संस्थेतील विद्यार्थी बेपत्ता झाल्याची तक्रार आल्यानंतर पोलिसांनी आजूबाजूच्या परिसरात चौकशी करून शोधमोहीम राबविली. मात्र, तो अद्यापही सापडलेला नाही. हिमांशू १६ फेब्रुवारीला 'आयसर'च्या आवारात असल्याचे संस्थेच्या सीसीटीव्ही फूटेजमध्ये दिसत आहे. मात्र, त्यानंतरच्या सीसीटीव्ही फुटेजमध्ये तो दिसत नाही,' अशी माहिती पोलिसांनी दिली. हिमांशू बेपत्ता असला, तरी त्याचे ओळखपत्र, मोबाइल फोन; तसेच अन्य महत्त्वाच्या गोष्टी वसतिगृहातच ठेवलेल्या आहेत. तो बेपत्ता झाल्याची माहिती पोलिसांनी; तसेच संस्थेच्या प्रशासनाने त्याच्या कुटुंबीयांना कळविली असून, त्याचे वडील पुण्यात आले आहेत. बेपत्ता झाल्याचे ट्विट 'आयसर'मधील विद्यार्थी हिमांशू बेपत्ता झाल्याचे ट्विट @IISERPune या ट्विटर हँडलवरून करण्यात आले आहे. हिमांशूची माहिती कोणाला मिळाल्यास, ती तातडीने द्यावी, असे आवाहन करण्यात आले असून, त्यासाठी एक मोबाइल फोन क्रमांक आणि आयसर संस्थेचा दूरध्वनी क्रमांक ट्विटमध्ये नमूद करण्यात आला आहे.
'आयसर'मधूनविद्यार्थी बेपत्ता
म टा...
महाराष्ट्र टाइम्स.कॉम 26 Feb 2020, 4:00 am