मावळ्याच्या वेशातला फोटो, साईनाथला शुभेच्छा, हकालपट्टी झाल्यानंतर वसंत मोरे यांचं पहिलं ट्विट

पुणे : मशिदीवरील भोंग्यांच्या संदर्भात ठामपणे विरोधाची भूमिका घेतलेल्या पुणे मनसे शहराध्यक्ष वसंत मोरेंना राज ठाकरेंनी दणका दिलाय. त्यांची शहराध्यक्षपदावरुन हकालपट्टी करत त्यांच्या जागी साईनाथ बाबर यांच्याकडे राज ठाकरे यांनी पुणे शहराचं नेतृत्व दिलंय. वसंत मोरे यांची हकालपट्टी करणं हा मनसेचा मोठा निर्णय मानला जातोय. कारण राज ठाकरे यांचे अतिशय विश्वासू आणि जवळचे साथीदार म्हणून वसंत मोरे यांची ओळख होती. पण भोंग्यांनी गणित बिघडवलं आणि राज ठाकरेंना वसंत मोरे यांच्याबाबतीत नकोसा निर्णय घ्यावा लागला. शहराध्यक्षपदावरुन हकालपट्टी झाल्यानंतर आणि पुणे शहराचं नेतृत्व बाबर यांच्याकडे दिल्यानंतर वसंत मोरे यांचं पहिलं ट्विट समोर आलंय. साईनाथ यांचं अभिनंदन करताना मी तुझाच मावळा असल्याचं वसंत मोरे यांनी म्हटलं आहे.



वसंत मोरे यांनी मावळ्याच्या वेशातला फोटो ट्विट केला आहे. नवनियुक्त शहराध्यक्ष साईनाथ बाबर यांच्यासोबतीचा हा फोटो आहे. दोघेही एकाच फोटोत असून वसंत मोरे मावळ्याच्या वेशात आहेत तर साईनाथ बाबर महाराजांच्या वेशात आहेत. आताच्या परिस्थितीला साजेशा फोटो ओळखून वसंत मोरेंनी बरोबर टायमिंग साधत "अरे मी तर कधीपासूनच तुझा मावळा आहे" असं म्हणत साईनाथ बाबर यांचं वसंत मोरेंनी अभिनंदन केलं आहे.

'कार्यक्षम नगरसेवक मनसेचे गटनेते साईनाथ बाबर यांची पुणे शहर अध्यक्ष पदी निवड! खूप खूप अभिनंदन साई', अशा शब्दात वसंत मोरे यांनी बाबर यांचं अभिनंदन केलं आहे. हकालपट्टी झाल्यानंतर अवघ्या काही वेळातच वसंत मोरे यांनी ट्विट केल्याने त्यांच्यावरच्या कारवाईचा त्यांना अगोदरच अंदाज आलेला असावा, अशी शक्यता व्यक्त केली जातीय.

तूर्तास, वसंत मोरे यांनी राज ठाकरेंच्या भूमिकेला विरोध केल्यानंतक मनसेच्या गोटात वादळ निर्माण झाले होते. पक्षाध्यक्षांचा आदेश वसंत मोरे धुडकावूच कसा शकतात, अशी कुजबूज पक्षनेत्यांमध्ये होती. पक्षाच्या व्हॉट्सअॅप ग्रुपमध्ये देखील वसंत मोरे यांच्याविरोधात काही मेसेज येत होते. या पार्श्वभूमीवर राज ठाकरे यांनी गुरुवारी शिवतीर्थवर पुण्यातील पदाधिकाऱ्यांची बैठक बोलावली होती. या बैठकीला बाबू वागसकर, अनिल शिदोरे, नगरसेवक साईनाथ बाबर यांना बोलावण्यात आले होते. तर वसंत मोरे यांना निमंत्रण देण्यात आले नव्हते. तेव्हाच वसंत मोरे यांच्यावर पक्षाकडून कारवाई होणार, याची कुणकुण लागली होती.



दरम्यान, साईनाथ बाबर यांच्यावर देण्यात आलेल्या नव्या जबाबदारीनंतर पक्षाकडून त्यांना शुभेच्छा देण्यात आल्या आहेत. "महाराष्ट्र नवनिर्माण सेनेचे अध्यक्ष राज ठाकरे यांच्या आदेशाने आज नगरसेवक साईनाथ संभाजी बाबर यांची पक्षाच्या पुणे शहर अध्यक्षपदी नियुक्ती करण्यात आली आहे. नव्या जबाबदारीसाठी साईनाथ बाबर यांचे मनःपूर्वक अभिनंदन आणि भावी राजकीय वाटचालीसाठी शुभेच्छा!"