राज ठाकरेंच्या दणक्यानंतरही वसंत मोरे म्हणाले, 'झुकेगा नहीं, भूमिका बदलणार नाही!'

पुणे : पुणे शहर मनसेच्या शहराध्यक्षपदावरुन हकालपट्टी झाल्यानंतरही वसंत मोरे आपल्या भूमिकेवर ठाम आहेत. "मी माझी भूमिका बदलणार नाही. भोंग्यांसंदर्भात आधी जी भूमिका मी घेतली होती, तीच माझी आताही भूमिका आहे. मी झुकणार नाही, माझी भूमिका बदलणार नाही. शेवटी आम्ही लोकप्रतिनिधी आहोत. आम्हाला लोकांना तोंड द्यावं लागतं", अशा स्पष्ट शब्दात वसंत मोरे यांनी आपली भूमिका पुन्हा एकदा जोरकसपणे मांडली.

मशिदीवरील भोंग्यांच्या संदर्भात ठामपणे विरोधाची भूमिका घेतलेल्या पुणे मनसे शहराध्यक्ष वसंत मोरेंना राज ठाकरेंनी दणका दिलाय. त्यांची शहराध्यक्षपदावरुन हकालपट्टी करत त्यांच्या जागी साईनाथ बाबर यांच्याकडे राज ठाकरे यांनी पुणे शहराचं नेतृत्व दिलंय. वसंत मोरेंनीही पक्षाचा आदेश मान्य करत साईनाथ बाबर यांचं मोठ्या मनाने अभिनंदन केलंय. पण पक्षाचा आदेश मान्य करताना आपल्या भूमिकेवरुन आपण तसूभरही मागे हटलो नाही, हे सांगायला देखील ते विसरले नाहीत.

"मी माझी भूमिका बदलणार नाही. मी लोकप्रतिनिधी आहे. शेवटी प्रत्येक लोकप्रतिनिधीला वाटतं की आपल्या वॉर्डात, प्रभातात सलोखा राहावा. आपला भाग शांत राहावा. तसं मलाही वाटतं. मग मी चुकलो कुठे?", असा सवाल यानिमित्ताने वसंत मोरे यांनी विचारला.

"माझी हकालपट्टी झालेली नाही. शेवटी पक्षात खांदेपालट होत असते. माझ्यावरील कारवाईआधी मीच राज ठाकरेंना सांगितलं होतं की, मे नंतर मला शहराध्यक्षपदावर राहायचं नाही, असा गौप्यस्फोटही त्यांनी केला. "सरतेशेवटी पक्षाने निर्णय घेतलाय. मी राजसाहेबांचा आदेश मानणारा कार्यकर्ता आहे. राजसाहेबांनी घेतलेला निर्णय मान्य आहे. त्यांच्यासोबत गेली २७ वर्ष मी काम करतोय साहेब हृदयात असतील. सध्यातरी मनसे सोडण्याचा माझा विचार नाही", असं स्पष्टपणे वसंत मोरे यांनी सांगितलं आहे.

दुसरीकडे आपल्यावरील आरोपांना उत्तर देण्यासाठी आणि पक्षातील कार्यकर्त्यांचा संभ्रम दूर करण्यासाठी राज ठाकरे यांची येत्या ९ एप्रिल रोजी ठाण्यास सभा पार पडतीय. या सभेत राज ठाकरे वसंत मोरे यांच्याबाबतीत काय भूमिका घेतात, वसंत मोरे यांच्या भूमिकेवर ते काय बोलतात, हे पाहणे महत्त्वाचे आहे.