मोबाइल घेऊन विक्रेता फरारी

म. टा. प्रतिनिधी, पुणे

धनकवडी परिसरातील एका मोबाईल विक्रेत्याने शहरातील १५ मोबाइल वितरकांना ९० लाखांहूनअधिक रकमेचा गंडा घातला आहे. त्यांचा विश्वास संपादित करून त्यांच्याकडून उधारीवर घेतलेले सुमारे अडीच मोबाइल घेऊन तो विक्रेता फरार झाला आहे. या प्रकरणी सहकारनगर पोलिस ठाण्यात गुन्हा नोंदविण्यात आला आहे.

मधूसिंग गिरीधरसिंग राजपूत (रा. बालाजीनगर, मूळ रा. राजस्थान) असे मोबाइल विक्रेत्याचे नाव आहे. याप्रकरणी संजय विनोद शहा (वय ५३, रा. कॅम्प) यांनी फिर्याद दिली आहे. शहा यांच्यासह १४ मोबाइल वितरकांची फसवणूक झाली आहे. मधूसिंग याचे धनकवडी येथे अनमोल टेलिकॉम नावाचे दुकान होते. या दुकानात तो मोबाइलसह टीव्ही आणि त्याच्या सुट्या भागांची विक्री करत होता.

शहा एका मोबाइल कंपनीचे अधिकृत वितरक आहेत. मधूसिंग याने शहा यांच्याशी संपर्क साधून व्यवसायास सुरुवात केली होती. सुरुवातीला त्याने प्रामाणिकपणे धंदा करून घेतलेल्या मालाचे वेळेवर पैसे दिले. त्यांचा विश्वास, संपादित केला. त्याने मार्च २०१८ पासून आठ नोव्हेंबर २०१८ पर्यंत त्याने शहा यांच्यासह अन्य १४ वितरकांकडून विविध कंपन्यांचे दोन हजार ४३६ नवीन मोबाइल, १२ टीव्ही आणि पेन ड्राइव्ह, हेडफोन यासारख्या इतर अॅक्सेसरीज असा एकूण ९० लाख ९६ हजार ३५५ रुपयांचा माल घेतला. त्यानंतर या मालाचे पैसे न देता तो पसार झाला. सहकार नगर पोलिस आरोपीचा शोध घेत आहेत. दरम्यान, फिर्यादी यांनी सर्वप्रथम मधूसिंगला कोर्टामार्फत नोटीस पाठविण्याचा निर्णय घेतला. मात्र, तो माल घेऊन पळून गेल्याचे निदर्शनास आल्यानंतर त्यांना पोलिसात फिर्याद देण्यास सांगितले, असे अॅड. पुष्कर पाटील यांनी सांगितले.

मोबाइल बंद असल्याने फसवणूक उघड

फिर्यादी संजय शहा यांनी आरोपीला ऑक्टोबर आणि नोव्हेंबरमध्ये ११ लाख ६३ हजार रुपयांचे मोबाइल उधारीवर दिले होते. त्या बिलाचे पैसे देण्यासाठी आरोपीने चेक दोन बँकांचे चार चेक दिले होते. ते चेक न वटल्याने शहा यांनी आरोपी मधूसिंगला फोन केला. त्यानंतर आरोपीने शहा यांच्या खात्यावर 'आरटीजीएस' द्वारे ५० हजार रुपये जमा केले. शहा यांनी आठ नोव्हेंबरला मधूसिंगला मोबाइलवर फोन केला असता, त्याचा फोन बंद होता. त्यामुळे शहा यांनी त्याचे दुकान आणि घरी चौकशी केली. त्या दोन्ही ठिकाणी कुलूप लावलेले आढळून आले. त्यांनी आसपास चौकशी केली असता, मधूसिंग दुकानातील सर्व माल घेऊन निघून गेल्याचे समजले. त्यानंतर शहा यांनी शहरातील अन्य वितरकांना संपर्क साधला. त्या वेळी त्याने एकूण १५ वितरकांची फसवणूक केल्याचे कळाले, असे शहा यांनी फिर्यादीत म्हटले आहे.


अपहार केलेल्या मालाचा तपशील

मोबाइल : २४३६

अक्सेसरीज : २१५६

टीव्ही : १२