नागरिकांच्या दारात फिरते पासपोर्ट केंद्र

पुण्याच्या शहरी, ग्रामीण भागात कार्यरत होणार

म. टा. प्रतिनिधी, पुणे

अर्ज भरण्यासाठी पासपोर्ट केंद्रात जाण्याऐवजी नागरिकांच्या दारात पासपोर्ट सेवा केंद्र आले तर... पुणे पासपोर्ट केंद्राच्या मोबाईल व्हॅनची अर्थात फिरत्या पासपोर्ट सेवा केंद्राची प्रायोगिक चाचणी यशस्वी झाली आहे. पुढील काही दिवसातच पुणे पासपोर्ट विभागातर्फे शहर आणि ग्रामीण भागात मोबाइल पासपोर्ट केंद्र कार्यरत होणार आहे. असा उपक्रम राबविणारे पुणे देशातील पहिले कार्यालय ठरणार आहे.

दिवसेंदिवस वाढत असलेली पासपोर्ट अर्जदारांची संख्या लक्षात घेऊन पुणे पासपोर्ट कार्यालयातर्फे सातत्याने नवनवीन उपक्रम राबविण्यात येत आहेत. गेल्या दोन वर्षात पासपोर्ट विभागाने अर्ज स्वीकारण्याची दैनंदिन मर्यादा वाढविली आहे. याशिवाय विभागाअंतर्गत येणाऱ्या शहरांमध्ये दर ठरावीक कालावधीनंतर मेळावा घेऊन अर्जदारांची सोय बघितली आहे. या उपक्रमांमुळे पासपोर्टची अपॉइंटमेंट मिळविण्यासाठी लागणारा कालावधी उल्लेखनीय प्रमाणात घटला आहे. याचाच पुढचा टप्पा म्हणून मोबाइल व्हॅनचा पर्याय निवडण्यात आला आहे.

बारामतीमध्ये नुकत्याच आयोजित करण्यात आलेल्या पासपोर्ट मेळाव्यामध्ये विद्या प्रतिष्ठानच्या इन्स्टिट्यूट ऑफ इन्फॉर्मेशन टेक्नॉलॉजीच्या सहभागातून मोबाइल व्हॅनमध्ये पासपोर्ट अर्ज स्वीकारण्याचा प्रयोग केला. व्हॅनमध्ये इंटरनेट सुविधा उपलब्ध झाल्याने तांत्रिकदृष्ट्या पासपोर्ट अर्जाची ऑनलाइन प्रक्रिया यशस्वी झाली आहे. त्यामुळे प्रायोगिक तत्त्वावर राबवलेला हा उपक्रम आता व्यापक स्वरूपात राबविण्यात येणार आहे. अजूनपर्यंत इतर कोणत्याही शहरात मोबाइल पासपोर्ट सेवा केंद्र कार्यरत नाही. त्यामुळे देशातील हा पथदर्शी प्रकल्प ठरणार आहे, असे पुणे विभागाचे वरिष्ठ पासपोर्ट अधिकारी अतुल गोतसुर्वे यांनी सांगितले.

केंद्रीय परराष्ट्र मंत्रालयाचे विशेष सचिव ज्ञानेश्वर मुळे यांच्या मार्गदर्शनानुसार गोतसुर्वे यांच्यासह, जतीन पोटे, सुशील गारासे, विराज देशमुख आणि व्हिआयआयटीचे डॉ. अमोल गोजे यांनी मोबाइल व्हॅनचा प्रयोग राबविला.