म. टा. प्रतिनिधी, पुणे
शहरात गेले काही दिवस पडणाऱ्या संततधार पावसाने गुरुवारी काहीशी विश्रांती घेतली. शहरात पावसाच्या हलक्या सरींनी हजेरी लावली. रात्री साडेआठपर्यंत शहरात ०.९ मिलिमीटर पावसाची नोंद झाली. दरम्यान, शुक्रवारी शहरात मध्यम स्वरूपाच्या पावसाची शक्यता वर्तविण्यात आली आहे. मध्य महाराष्ट्रात तुरळक ठिकाणी अतिवृष्टीचीही शक्यता वर्तविण्यात आली आहे.
गुरुवारी शहरात मध्यम स्वरूपाचा पाऊस होईल, असा अंदाज वर्तविण्यात आला होता. मात्र, एक-दोन सरी वगळता शहरात पावसाने विश्रांती घेणेच पसंत केले. सकाळी काही भागात सूर्यदर्शनदेखील झाले. रात्री नऊच्या सुमारास हलका पाऊस झाला. त्या व्यतिरिक्त गुरुवारी दिवसभरात पाऊस झाला नाही. पुण्यात पावसाने विश्रांती घेतली असली तरी राज्यात अनेक ठिकाणी पावसाने हजेरी लावली. सायंकाळी साडेपाचपर्यंत राज्यातील सर्वाधिक पावसाची नोंद महाबळेश्वर येथे (५३ मिमी) झाली. विदर्भात पावसाचा जोर होता. शुक्रवारी राज्यात कोकण व मध्य महाराष्ट्रात बहुतांश ठिकाणी, विदर्भात बऱ्याच ठिकाणी तर मराठवाड्यात काही ठिकाणी पावसाची शक्यता आहे. मध्य महाराष्ट्रात तुरळक ठिकाणी अतिवृष्टीचीही शक्यता वर्तविण्यात आली आहे.
शहर : पाऊस (मिमी)
महाबळेश्वर : ५३
नागपूर : ४२
वर्धा : २८
यवतमाळ : ३३
अमरावती : २९
जळगाव : २३
कोल्हापूर : १८
औरंगाबाद : ६
सातारा : २