‘मॉडर्न एज्युकेशन’चे संविधान गहाळ?

आरटीआय कार्यकर्ते विवेक वेलणकर यांचा दावा

म. टा. प्रतिनिधी, पुणे

पुण्यातील वाडिया कॉलेज आणि मुंबईच्या रुपारेल कॉलेजच्या ‘मॉडर्न एज्युकेशन सोसायटी’ची धर्मादाय आयुक्त कार्यालयातील संविधानाची प्रत गहाळ झाल्याचा आरोप माहिती अधिकार आणि सामाजिक कार्यकर्ते विवेक वेलणकर यांनी केला आहे. सामाजिक बांधिलकी म्हणून चालविल्या जाणाऱ्या या संस्थेची संविधानाची प्रत गहाळ होणे ही गंभीर बाब असल्याचे वेलणकर यांनी म्हटले आहे.
मॉडर्न एज्युकेशन सोसायटीची स्थापना १९३२मध्ये अपील सोसायटी अॅक्टनुसार झाली. संस्थेची नोंदणी १९५०मध्ये ट्रस्ट अॅक्टमार्फत करण्यात आली. या संस्थेला धर्मादाय आयुक्तालयाकडून नोंदणी प्रमाणपत्र देण्यात आले असून, ते सुरक्षित आहे. वेलणकर आणि त्यांच्या सहकारी अंजली दमानिया यांनी दोन महिन्यांपूर्वी धर्मादाय आयुक्तांकडे संस्थेच्या संविधानाच्या छायांकित प्रतीची माहितीच्या अधिकारात मागणी केली. मात्र, त्यांना देण्यास टाळाटाळ करण्यात आली. सर्वप्रथम संविधान प्रत सापडत नाही, असे उत्तर त्यांना देण्यात आले. त्यानंतर वेलणकर यांनी अपिलीय अधिकाऱ्यांकडे अर्ज केला. त्याच्या सुनावणीला संबंधित अधिकारी उपस्थितच राहिले नाहीत. ते पाहून संविधानाची प्रत गहाळ झाल्याचे स्पष्ट होते, असे वेलणकर म्हणाले.
या संस्थेंतर्गत पुणे आ​णि मुंबई येथे लाखो विद्यार्थ्यांनी शिक्षण घेतले आहे. या संस्थेच्या संविधानात नमूद केल्याप्रमाणे संस्थेतील शिक्षक हेच पदाधिकारी आणि सदस्य आहेत. तसेच, ही संस्था सामाजिक बांधिलकीवर चालविली जाते. मात्र, संविधान प्रतच गहाळ झाल्याने त्याचा गैरफायदा घेतला जाऊ शकतो, असे वेलणकर यांचे म्हणणे आहे.