पाणीपुरवठ्यासाठी आंदोलन

म. टा. प्रतिनिधी, हडपसर
महंमदवाडी कौसरबाग परिसरात मागील तीन महिन्यांपासून कमी दाबाने पाणी येत आहे, रात्रीच्या वेळेस पाणी सोडले जाते. यामुळे नागरिकांनी रात्रभर पाणीच भरावे का, असा प्रश्न उपस्थित केला जात आहे. जोपर्यंत सुरळीत पाणीपुरवठा होऊन वेळेवर पाणी सोडले जात नाही, तोपर्यंत आम्ही गप्प बसणार नाही, असे सांगून शिवसेनेच्या वतीने लष्कर पाणीपुरवठा कार्यालयासमोर सोमवारी आंदोलन करण्यात आले.
प्रभाग क्र. २६ (महंमदवाडी, कौसरबाग) शिवसेनेचे नगरसेवक प्रमोद भानगिरे व नगरसेविका प्राची आल्हाट यांच्या नेतृत्वाखाली लष्कर पाणीपुरवठा येथे आंदोलन झाले. लष्कर पाणीपुरवठा विभागाकडून कमी दाबाने पाणीपुरवठा होते. ते ही रात्रीच्या वेळेस पाणी सोडले जाते. त्यामुळे नागरिकांना पाण्याची वाट बघत बसावे लागते. कमी दाबाने पाणी येत असल्याने पाणी भरण्यासाठी खूप वेळ लागतो. पुरवठा विभागाच्या ढिसाळ नियोजनामुळे नागरिकांना त्रास सहन करावा लागत आहे. नगरसेवक प्रमोद भानगिरे व नगरसेविका प्राची आल्हाट यांनी स्थानिक नागरिकांना सोबत घेऊन लष्कर पाणीपुरवठा कार्यालयावर मोर्चा काढला. या वेळी नाना तरवडे, आशिष आल्हाट, दत्ता घुले, अभिजित बाबर, राहुल भुजबळ, आकाश भानगिरे, सुशील मिश्रा यांच्यासह महिला, ज्येष्ठ नागरिक आणि शिवसैनिक उपस्थित होते. आठ दिवसांच्या आत पाणीपुरवठा सुरळीत झाला नाही; तर यापुढचे आंदोलन तीव्र असेल, असा इशारा भानगिरे यांनी दिला. या वेळी लष्कर पाणीपुरवठा विभाग प्रमुख पौरा यांनी निवेदन स्वीकारले आणि पाणी सुरळीत सोडण्याचा
शब्द दिला.