ग्रहणाच्या वेधात रक्षाबंधन करावे: दाते

म. टा. प्रतिनिधी, पुणे

यंदा रक्षाबंधन आणि चंद्रग्रहण एकाच तारखेला आल्यामुळे नागरिकांमध्ये संभ्रम निर्माण झाला आहे. येत्या सोमवारी ७ ऑगस्टला चंद्रग्रहण असल्याने नागरिकांनी वेधकाळात म्हणजेच रात्री दहा पर्यंत रक्षाबंधन करावे, अशी माहिती पंचांगकर्ते मोहन दाते यांनी दिली आहे.

या वर्षी सोमवारी, ७ ऑगस्टला चंद्रग्रहण आहे. रात्री १०.५२ ते १२.४९ पर्यंत ग्रहण पर्वकाळ असून या ग्रहणाचे वेध दुपारी १ पासून सुरू होणार आहेत. त्यामुळे दुपारी एक वाजण्यापूर्वी घरातील सर्वांचे भोजन होईल, अशा पद्धतीने कुलधर्म कुलाचार निमित्ताचे पूजन करावे. सोमवारचा उपवास असल्यास दुपारी एक वाजण्यापूर्वीच फलाहार करावा आणि ‘वेधात सायंकाळी सोमवारची पूजा करून उपवास सोडीत आहे’, असा संकल्प करून नुसते तीर्थ घेणे योग्य होईल. कारण वेधात जलपान निषेध नाही मात्र भोजन निषेध आहे. वेधकाळात रक्षाबंधन करता येत असल्याने रात्री दहा पर्यंत राखी बांधता येईल. यापूर्वी ६ ऑगस्ट १९९० या दिवशी श्रावण पौर्णिमेस सोमवारी चंद्रग्रहण होते आणि त्यानंतर १६ ऑगस्ट २००८ शनिवारी श्रावण पौर्णिमेस चंद्रग्रहण आले होते, असे दाते यांनी सांगितले.