मोहसीन शेख हत्या: रोहिणी सालियन वकीलपत्र घेणार

मटा ऑनलाइन वृत्त । पुणे

पुण्यात जमावाकडून हत्या करण्यात आलेल्या मोहसीन शेख हत्याप्रकरणी वकीलपत्र घेण्यास ज्येष्ठ वकील रोहिणी सालियन यांनी तयारी दर्शविली आहे. सालियन यांनी मोहसीनचे वडील मोबीन शेख यांना तसे पत्रही दिले आहे. त्यामुळे हा खटला पुन्हा सुरू होण्याची चिन्हे आहेत.

२ जून २०१४ रोजी पुण्यातील एका आयटी कंपनीत काम करणाऱ्या मोहसीन शेखची जमावाने हत्या केली होती. याप्रकरणी पोलिसांनी हिंदू राष्ट्र सेनेचा प्रमुख धनंजय देसाईसह २१ जणांना येरवड्यातून अटक केली होती. त्यानंतर या प्रकरणात बाजू मांडण्यासाठी राज्यसरकारने सरकारी वकील उज्ज्वल निकम यांची नियुक्ती केली होती. मात्र नंतर निकम यांनी कोणतेच कारण न देता या खटल्यातून अंग काढून घेतले. त्यामुळे बरेच महिने या खटल्याची सुनावणी झाली नाही. आता सालियन यांनीच हा खटला लढवण्याची इच्छा व्यक्त केल्याने या खटल्याला पुन्हा गती मिळणार असल्याचं सुत्रांनी सांगितलं.