राज्यात टीबीचे ११० पेशंट

क्षयरोग तपासणी मोहिमेत आठ लाख जणांची तपासणी

म. टा. प्रतिनिधी, पुणे

क्षयरोगाची (टीबी) लक्षणे असणारे मात्र आजाराचे निदान न झालेले असे ११० पेशंट पुण्यासह राज्यात आढळून आले आहेत. एकूण पेशंटांमध्ये पुण्यातील दहा आणि पिंपरी चिंचवडमधील आठ पेशंटचा समावेश आहे.
सोळा ते तीस जानेवारीदरम्यान पाच महापालिका कार्यक्षेत्रात ही शोधमोहीम राबविण्यात आली. ‘मोहिमेंतर्गत राज्यात सात लाख ८० हजार जणांची तपासणी करण्यात आली. त्यांना टीबीची लागण झाली आहे की नाही याची खात्री कऱण्यात आली. त्यामध्ये मुंबई, पुणे, पिंपरी चिंचवड, ठाणे, भिवंडी निझामपूर या पालिकांचा समावेश असून, येथे ११० पेशंट आढळून आले. पुण्यामध्ये १ लाख ६० हजार जणांची तपासणी करण्यात आली. झोपडपट्टीतील नागरिकांना तपासणीत प्राधान्य देण्यात आले. टीबीचा संसर्ग रोखण्यासाठी आरोग्य खात्याने मोहीम राबविली. उपचार उपलब्ध करून संबंधितांचा आजार बरा करणे, हा मोहिमेचा उद्देश होता,’ अशी माहिती आरोग्य खात्याचे राज्य क्षयरोग नियंत्रण अधिकारी डॉ. संजीव कांबळे यांनी दिली.
टीबीच्या पेशंटचे निदान करून त्यांना वेळोवेळी उपचार मिळावेत, यासाठी निदान करणे गरजेचे होते. अनेक पेशंट हॉस्पिटलपर्यंत गेले; पण सामाजिक न्यूनगंड अथवा भीतीपोटी चाचण्या न करताच परतले. टीबीच्या आजाराचे निदान झाले नसले तरी, अनेक पेशंटमध्ये लक्षणे आढळली. या मोहिमेंतर्गत टीबीची लक्षणे असलेल्या पेशंटचा प्रामुख्याने शोध घेण्यात आला. संशयित व्यक्तींच्या थुंकीचे नमुने तपासणीसाठी घेण्यात आले. ज्या संशयितांच्या थुंकीमध्ये काहीही आढळले नाही अशांचे छातीचे एक्स रे, तसेच अन्य चाचण्या करण्यात आल्या. त्यातही काहीही न आढळल्याने पुढील विशेष चाचण्या करण्यात आल्या, असेही आरोग्य खात्यातील अधिकाऱ्यांनी सांगितले.