म. टा. प्रतिनिधी, पुणे
मुस्लिम समाजाला आरक्षण देण्याच्या प्रमुख मागणीबरोबरच अन्य मागण्यांसाठी पुण्यात उद्या, रविवारी (९ सप्टेंबर) मुस्लिम मूक महामोर्चाचे आयोजन करण्यात आले आहे. या मोर्चाला विविध संघटना आणि राजकीय पक्षांनी पाठिंबा देऊन सहभागी होणार असल्याचे जाहीर केले आहे.
गोळीबार मैदान येथून सकाळी दहा वाजता या मोर्चाला सुरुवात होणार आहे. गोळीबार मैदान ते काउन्सिल हॉल या मार्गे हा मोर्चा काढला जाईल. गोळीबार मैदान येथून रामोशी गेट, संत कबीर चौक, डॉ. आंबेडकर भवन, ससून हॉस्पिटल, डॉ. आंबेडकर पुतळा, साधू वासवानी पुतळा ते काउन्सिल हॉल असा मोर्चाचा मार्ग असणार आहे.
पुणे महापालिकेचे उपमहापौर डॉ. सिद्धार्थ धेंडे यांनी मोर्चात सहभागी होणार असल्याचे जाहीर केले आहे. या मोर्चामध्ये शेतकरी कामगार पक्ष, रिपब्लिकन पार्टी ऑफ इंडिया, मातंग एकता आंदोलन, समाजवादी पार्टी, बहुजन समाज पार्टी, भीम छावा, मातंग संघर्ष महामोर्चा, लहुजी समता परिषद, राष्ट्रीय जनसेवा प्रतिष्ठान, जनता दल (सेक्युलर), क्रांतिवीर लहुजी शक्ती सेना, पुणे व्हिजन, रिपब्लिकन युवा मोर्चा आदी संघटना सहभागी होणार आहेत. 'या मोर्चामध्ये कोणताही पक्ष, धर्म किंवा संघटनेचा झेंडा घेतला जाणार नसून, फक्त राष्ट्रध्वज असणार आहे,' असे मोर्चाचे समन्वयक अंजुम इनामदार यांनी सांगितले.