संसर्गाच्या पार्श्वभूमीवर पूना मर्चंट चेंबरचा निर्णय
म. टा. प्रतिनिधी, पुणे
मार्केट यार्डातील भाजीपाला, फळे, कांदा, बटाटा बाजार शुक्रवारपासून बंद करण्यात आल्यानंतर त्यापाठोपाठ १३ एप्रिलपासून मार्केट यार्डातील गूळ आणि भुसार विभागही पुढील आदेश येईपर्यंत बंद ठेवण्याचा निर्णय दी पूना मर्चंट चेंबरने घेतला आहे. शिवाय फूल बाजारही १५एप्रिलपर्यंत बंदच राहणार आहे.
शहरातील गुलटेकडी, महर्षी नगर, कोंढवा आदी भागांमध्ये करोनाचा संसर्ग वाढल्याचे चित्र आहे. या पार्श्वभूमीवर महापालिका प्रशासनाने शहरातील विविध भाग सील केले आहेत. त्यामध्ये गुलटेकडी परिसराचा समावेश आहे. महर्षी नगर, गुलटेकडी या भागांतील अनेक आडते आणि कामगारांमध्ये संसर्गाची भीती निर्माण झाली आहे. त्यामुळे ते कामावर येत नाहीत. याच कारणास्तव मार्केट यार्डातील आडते असोसिएशनने पुढील आदेश येईपर्यंत बाजार बंद ठेवण्याचा निर्णय घेतला आहे. यासंदर्भात बाजार समितीचे प्रशासक बी. जे. देशमुख यांनी विभागीय आयुक्त डॉ. दीपक म्हैसेकर तसेच जिल्हाधिकारी नवल किशोर राम यांच्याशी चर्चा करून मार्केट यार्ड शुक्रवारपासून बंद ठेवण्याचा निर्णय घेतला.
...
उपबाजारात ३०० गाड्यांची आवक
छत्रपती शिवाजी मार्केट यार्ड संसर्गामुळे शुक्रवारपासून बंद ठेवण्यात आल्यानंतर बाजार समितीच्या उपबाजारात भाजीपाल्याच्या ३०१ गाड्यांची आवक झाली. मार्केट यार्डातील घाऊक भाजीपाला बाजार बंद असला, तरी भाजीपाल्याचा तुटवडा जाणार नाही. बाजार समितीच्या उपबाजारात नियमित आवक सुरू आहे. शुक्रवारी मोशी येथील उपबाजारात २७५ भाजीपाल्याच्या गाड्यांची आवक झाली. खडकी येथील उपबाजारात २० गाड्या आणि उत्तमनगर येथील बाजारात ६ गाड्यांची आवक झाली. शुक्रवारी उपबाजारात एकूण मिळून ४ हजार ४०० क्विंटल भाजीपाल्याची आवक झाली. सोलापूर रस्त्यावरील मांजरी येथील उपबाजारात होणाऱ्या गर्दीमुळे तेथील कामकाज सध्या बंद आहे. शहरात भाजीपाल्याची नियमित आवक सुरू राहणार असून, बाजार समितीकडून आवक नियमित सुरू ठेवण्यासाठी प्रयत्न करण्यात येत आहेत, असे पुणे कृषी उत्पन्न बाजार समितीचे प्रशासक बी. जे. देशमुख यांनी सांगितले. तसेच, मार्केट यार्डातील फूल बाजारातील कामकाज १५ एप्रिलपर्यंत बंद ठेवण्याचा निर्णय आडते संघटनेने घेतला आहे.