म. टा. प्रतिनिधी, पिंपरी
लॉकडाउनच्या कालावधीत शहरातील नागरिकांना पाणी, वीज अखंडितपणे मिळावी, तसेच शहर परिसरातील स्वच्छता कायम राहावी याकडे महापालिका प्रशासनाने भर दिला आहे. महापालिकेने सक्षम यंत्रणा राबवत पाणी पुरवठा, रस्त्यांवरील वीज पुरवठा, झाडलोट, कचरा उचलणे, दररोज शहर स्वच्छ ठेवण्यावर भर दिला आहे. त्यासाठी पाच हजार स्वच्छता कर्मचारी रस्त्यावर आहेत.
महापालिका आयुक्त श्रावण हर्डीकर यांनी पाणी, आरोग्य, वीज या मूलभूत सुविधांना प्राधान्य देऊन त्यात खंड पडू नये असे नियोजन करण्यावर भर दिला आहे. शहरात मागील काही दिवसांपासून पाण्याची समस्या होती. मात्र, लॉकडाउनमध्ये योग्य नियोजनामुळे पाणीपुरवठा सुरळीत होत आहे. महापालिकेचे पाच हजार स्वच्छता कर्मचारी संपूर्ण शहराची झाडलोट, दररोजचा कचरा उचलत आहेत. आरोग्य खात्याच्या कर्मचाऱ्यांद्वारे औषध फवारणीची कामे केली जात आहेत. त्यामुळे स्वछता दूतांचे सर्वत्र कौतुक केले जात आहे.