पालिकेच्या डॉक्टरभरतीला येणार वेग
आज मेरिट लिस्ट होणार जाहीरम टा...
आज मेरिट लिस्ट होणार जाहीर
म. टा. प्रतिनिधी, पुणे
महापालिकेतील डॉक्टरांच्या भरती प्रक्रियेला वेग आला असून, कायमस्वरूपी भरण्यात येणाऱ्या डॉक्टर आणि पॅरामेडिकल पदांची 'मेरिट लिस्ट' आज, शुक्रवारी जाहीर करण्यात येणार आहे. पुढील दोन दिवसांत त्यावरील हरकती आणि सूचना मागविण्यात येणार असल्याची माहिती महापालिका आयुक्त शेखर गायकवाड यांनी दिली.
महापालिकेतील रखडलेल्या डॉक्टर भरतीला 'महाराष्ट्र टाइम्स'च्या वृत्तानंतर वेग आला असून, कायमस्वरूपी भरण्यात येणाऱ्या पदांची 'मेरिट लिस्ट' जाहीर झाल्यानंतर कंत्राटी पद्धतीने भरण्यात येणाऱ्या पदांच्या भरतीलाही वेग येणार आहे. करोनाबाधितांचा शोध घेऊन त्यांच्यावर उपचार करणारे महापालिकेचे डॉक्टर, परिचारिका; तसेच इतर पॅरामेडिकल स्टाफने गेले ७५ दिवस कुठलीही सुट्टी न घेता स्वत:ला या लढाईत झोकून दिले आहे. शहरातील ४० हजार नागरिकांची तपासणी आणि उपचार या काळात करण्यात आले आहेत. यातील बहुतांश डॉक्टर आणि वैद्यकीय कर्मचारी थकले असून, त्यांना काही काळ विश्रांतीची गरज आहे.
लॉकडाउनमुळे निर्माण झालेल्या अडचणींमुळे महापालिकेतील भरती प्रक्रिया रखडली होती. त्यामुळे महापालिकेतील डॉक्टरांना विश्रांती मिळण्याची चिन्हे दिसत नव्हती. या पार्श्वभूमीवर 'महाराष्ट्र टाइम्स'ने भूमिका घेतल्यानंतर महापालिकेतील पदाधिकारी, विरोधी पक्ष तसेच गटनेत्यांनी या विषय ऐरणीवर आणून रखडलेल्या भरतीला वेग देण्यासाठी आग्रह धरला. महापालिका आयुक्तांनी भरतीसाठीची 'मेरिट लिस्ट' तत्काळ जाहीर करण्याचे प्रशासनाला आदेश दिल्यानंतर अखेर ही यादी शुक्रवारी जाहीर होणार आहे.
भरतीचे सर्वाधिकार मुख्यसभेला असून, ही सभा पुढील दोन ते तीन महिने होऊ शकणार नाही. या भरतीमध्ये राज्यभरातील ११०० उमेदवारांनी अर्ज केले आहेत. ते लॉकडाउनमुळे पोहोचू न शकल्याने त्यांनी लॉकडाउन संपल्यानंतर आपली कागदपत्रे सादर करू, अशी विनंती केली होती. तरीही शक्य तितक्या उमेदवारांची कागदपत्रे मिळाली आहेत. त्यानुसार 'मेरिट लिस्ट' तयार करण्यात आली असून, ती जाहीर करण्यात येणार आहे. तत्काळ आवश्यकता असलेली पदांची मेरिट लिस्ट असणार असून, त्यावर दोन दिवसांत हरकती सूचना मागविण्यात येणार आहे. त्यानंतर अंतिम यादी प्रसिद्ध करण्यात येणार आहे. अंतिम यादीत नावे असणाऱ्या उमेदवारांना कंत्राटी पद्धतीने तत्काळ कामावर घेण्यात येणार असून, त्यानुसार महापालिकेची सध्याची अडचण दूर होईल अशा विश्वास आयुक्तांनी व्यक्त केला.