​डोक्यात हातोडा घालून उद्योजकाचा खून

म. टा. प्रतिनिधी, पिंपरी

भोसरी येथील लघु उद्योजक विजय सुभेदार पवार (४५) यांचा अज्ञात व्यक्तीने डोक्यात हातोडा घालून निर्घृण खून केला. भोसरी एमआयडीसीमधील सेक्टर चारमध्ये गुरुवारी रात्री दोनच्या सुमारास ही घटना घडली. पवार हे शिवम एन्टरप्रायजेसचे भागीदार होते. सकाळी त्यांच्या कंपनीचे सुरक्षारक्षक आल्यावर ही घटना उघडकीस आली.

पोलिसांनी दिलेल्या माहितीनुसार, विजय पवार हे पोपट तुकाराम रासकर यांच्यासोबत भागीदारीमध्ये भोसरी येथील सेक्टर क्रमांक चारमध्ये शिवम एन्टरप्रायजेस ही फॅब्रिकेशनची कंपनी चालवत होते. रात्री ते त्यांच्या कंपनीमध्ये एकटे झोपलेले असताना अज्ञात व्यक्तीने रात्री दोनच्या सुमारास त्यांच्या डोक्यात हातोडा घालून खून केला. ही घटना सकाळी कंपनीचा सुरक्षारक्षक तेथे आल्यानंतर उघडकीस आली. हा खून कोणी केला व त्यामागचे कारण हे अद्याप स्पष्ट होऊ शकलेले नाही. या घटनेबाबत भोसरी एमआयडीसी पोलिस ठाण्यात खुनाचा गुन्हा दाखल करण्यात आला आहे.