म. टा. प्रतिनिधी, येरवडा
किरकोळ भांडणातून आठ जणांच्या टोळीने केटरिंग व्यवसायिक तरुणाचा येरवडा मेंटल हॉस्पिटलच्या मोकळ्या मैदानात निर्घृण खून केल्याची घटना घडली. या प्रकरणी येरवडा पोलिसांनी चार आरोपींना अटक केली असून, चार अल्पवयीन मुलांना ताब्यात घेतले आहे.
प्रतिक हनुमंत वन्नाळे (वय २७, रा. पंचशील नगर, येरवडा) असे खून झालेल्या तरुणाचे नाव आहे. या प्रकरणी मृत तरुणाचे वडील हनुमंत वन्नाळे (वय ५२) यांनी फिर्याद दिली आहे. त्यावरून पोलिसांनी राहुल भोसले (वय १९, रा. धानोरी), तैय्यब शेख (वय १८, रा. धानोरी), अमीन जावेद शेख (वय १८, रा. मेंटल कॉर्नर, येरवडा) आणि बच्चू वडनवर (वय १८) अशी अटक केलेल्या आरोपींची नावे आहेत .
प्रतीक वन्नाळे केटरिंगचा व्यवसाय करीत होता. सोमवारी दुपारी प्रतीक आणि त्याचा मित्र एफाज कुरेशी यांचे भांडण झाले होते. या भांडणाच्या रागातून कुरेशीने त्यांच्या मित्रांसह प्रतीकच्या खुनाचा कट रचला. कुरेशीने सोमवारी रात्री प्रतीकला मेंटल हॉस्पिटलच्या मैदानात बोलावून घेतले. त्यानंतर कुरेशी याने त्याच्या मित्रांसह प्रतीकला शिवीगाळ करून लाथाबुक्क्यांनी मारहाण केली. त्यानंतर धारधार हत्यारांनी आणि कुऱ्हाडीने वार करून त्याचा खून केला. खुनाच्या घटनेची माहिती मिळताच येरवडा पोलिस उपायुक्त पंकज देशमुख, सहायक आयुक्त रामचंद्र देसाई, वरिष्ठ पोलिस निरीक्षक युनुस शेख, गुन्हे निरीक्षक अजय वाघमारे यांनी घटनास्थळी भेट दिली. पोलिसांनी सोमवारी रात्री तीन संशयित आरोपींना ताब्यात घेऊन कसून चौकशी केल्यावर रात्रभरात आणखीन पाच जणांना ताब्यात घेतले. आठपैकी चार आरोपींना अटक करण्यात आली असून, चार अल्पवयीन मुलांना ताब्यात ठेवण्यात आले आहे.