वहिनीला दर्शनासाठी डोंगरावर बोलवून दीराने केली भलतीच मागणी; नकार देताच...

म. टा. प्रतिनिधी, पिंपरी

महाराष्ट्र टाइम्स.कॉम

दर्शनासाठी घोरावडेश्वर डोंगरावर नेऊन चुलत दीराच्या मित्राने महिलेवर जबरदस्तीने बलात्कार केला. त्यानंतर तिच्या चुलत दीरानेही तिच्याकडे शरीरसुखाची मागणी केली. मात्र, महिलेने नकार दिल्याने त्याने ओढणीच्या मदतीने गळा दाबून तिचा खून केला. तसेच, तोंडावर दगडाने मारून मृतदेह झाडीत टाकला. ही घटना पुणे- मुंबई महामार्गावर घोरावडेश्वर डोंगरावर सोमवारी सकाळी उघडकीस आली.

मयत महिलेच्या पतीने या प्रकरणी तळेगाव दाभाडे पोलिस ठाण्यात फिर्याद दिली आहे. त्यानुसार, पोलिसांनी आरोपी दीराला (वय २६, रा. देहूरोड) अटक केली. अन्य आरोपी अक्षय कारंडे फरारी असून, त्याचा शोध सुरू आहे. पोलिस निरीक्षक शहाजी पवार यांनी दिलेल्या माहितीनुसार, मयत महिला गृहिणी असून तिचा पती मजुरीची कामे करतो. महिला १९ वर्षांची असून, वर्षभरापूर्वी तिचे लग्न झाले होते. रविवारी सकाळी दहा वाजता आरोपींनी महिलेला दर्शनासाठी घोरावडेश्वर डोंगरावर नेले. तेथे गेल्यावर अक्षय याने झाडीत नेऊन तिच्यावर बलात्कार केला. त्यानंतर दीरानेही वहिनीकडे शरीरसुखाची मागणी केली. मात्र, तिने नकार दिल्यामुळे चिडलेल्या दीराने ओढणीने गळा दाबून तिचा खून केला. ओळख पटू नये म्हणून तोंडावर दगडाने मारून मृतदेह झाडीत टाकला.