ज्येष्ठ गायक पं. नारायणराव बोडस यांचं निधन

मटा ऑनलाइन वृत्त । पुणे

ग्वाल्हेर घराण्याचे ज्येष्ठ शास्त्रीय गायक पं. नारायणराव बोडस यांचे आज सकाळी पुण्यात वृद्धापकाळानं निधन झालं. ते ८५ वर्षांचे होते. भारदस्त आवाज आणि बोलक्या चेहऱ्याचे व्यक्तिमत्त्व म्हणून ख्याती असलेल्या पं. नारायणराव बोडस यांच्या निधनानं अवघी संगीतसृष्टी हळहळली.

थेट पंडित विष्णू दिगंबर पलुसकर यांच्या गायकीशी नाते सांगणाऱ्या बोडस घराण्यात नारायणरावांचा जन्म झाला. त्यांचं संगीताचं शिक्षण वडील लक्ष्मणराव तसंच, प्रल्हादपंत गानू यांच्याकडं झालं. 'सौभाग्यरमा' या डॉ. बी. एन. पुरंदरे लिखित नाटकापासून गायक नट म्हणून त्यांच्या कारकीदीर्ची सुरुवात झाली. नोकरी आणि शास्त्रीय गायनाचा रियाज अशी कसरत करीत त्यांनी संगीतसाधना केली. दाजी भाटवडेकर यांना नारायणरावांचे व्यक्तिमत्त्व आवडले आणि त्यांनी लगेच 'संगीत शारदम्' या संस्कृत नाटकासाठी नारायणरावांची निवड केली. त्यानंतर दाजी भाटवडेकरांच्या अनेक नाटकात त्यांनी भूमिका केल्या. 'संगीत सौभद्रम्', 'पती गेले गं काठेवाडी', 'बुद्ध तिथे हरला', 'सं. मृच्छकटिक', 'सं. महाश्वेता', 'संगीत मानापमान', 'सं. स्वयंवर', 'सं. सौभद्र', 'सं. संशयकल्लोळ' अशा अनेक संगीत नाटकात त्यांनी अविस्मरणीय भूमिका केल्या. त्यांच्या या प्रदीर्घ संगीतसेवेचा शासनानं बालगंधर्व पुरस्कार देऊन गौरवही केला होता.

वयाची साठी पूर्ण झाल्यावर १९९३ साली नारायणरावांनी रंगभूमीची कायमची रजा घेण्याचा निर्णय घेतला. त्यानंतर त्यांनी संगीत अध्यापनाचे काम सुरू केले. १२ वर्ष त्यांनी मुंबई विद्यापीठात पदवी व पदव्युत्तर विद्यार्थ्यांना संगीत शिकवले. तेथून निवृत्त झाल्यावर २००६पासून ते वाशी येथील गांधर्व महाविद्यालयात संगीत शिकणाऱ्या विद्यार्थ्यांना विनामूल्य मार्गदर्शन करीत होते. सध्या त्यांचे चिरंजीव केदार बोडस त्यांचा सांगितिक वारसा पुढे नेत आहेत.