काँग्रेसच्या सविता वारकड यांची निवड जवळपास निश्चित
नांदेड : जिल्हा परिषद अध्यक्षपदासाठी मंगळवारी होणाऱ्या निवडणुकीत भोकर मतदारसंघातल्या बारड गटातून विजयी झालेल्या सविता वारकड यांची निवड जवळपास निश्चित मानली जाते. सोमवारी महाआघाडीच्या बैठकीत पदाधिकारी निवडीचे सर्वाधिकार माजी मुख्यमंत्री अशोक चव्हाण यांना देण्यात आले.
नांदेड जिल्हा परिषदेचे अध्यक्षपद हे अनुसूचित जमाती प्रवर्गातील महिलेसाठी राखीव करण्यात आले आहे. २१ जानेवारीला अध्यक्ष- उपाध्यक्षपदाची निवडणूक होणार आहे. राज्यातल्या सत्तांतरानंतर नांदेडमध्येही महाविकास आघाडीचा प्रयोग केला जाणार आहे. अध्यक्षपद हे काँग्रेसला मिळेल यात कोणतीही शंका नाही. अन्य कोणत्याही पक्षाकडे या प्रवर्गातील उमेदवार नाही. अध्यक्षपद मिळविताना अन्य पदे मिळवण्यासाठी काँग्रेसने मोर्चेबांधणी केली आहे. भाजपचे १३ सदस्य आहेत. शिवसेनेच्या दहा सदस्यांपैकी अनेकांनी काँग्रेसला समर्थन देण्याची भूमिका घेतली आहे. शिवाय राष्ट्रवादीचा एक गट काँग्रेस सोबतच आहे. शिवसेना व राष्ट्रवादी काँग्रेसला प्रत्येकी एक सभापतीपद देतांना अध्यक्ष, उपाध्यक्ष व उर्वरित सभापतीपदे पदरात पाडून घेण्याची मोर्चेबांधणी काँग्रेसने केली आहे.
माजी मुख्यमंत्री अशोक चव्हाण, खासदार हेमंत पाटील, माजी आमदार प्रदिप नाईक, शंकरअण्णा धोंडगे यांच्या प्रमुख उपस्थितीत महाआघाडीची बैठक पार पडली. या बैठकीत पदाधिकारी निवडीचे अधिकार अशोक चव्हाण यांना देण्यात आले आहेत. अध्यक्षपदासाठी बारड गटाच्या सविता वारकड व बाऱ्हाळी गटाच्या मंगाराणी आंबुलगेकर यांच्यात जोरदार चुरस आहे. अशोक चव्हाण यांच्या भोकर विधानसभा मतदारसंघातून सविता वारकड विजयी झाल्या आहेत. मुखेड तालुक्यातल्या बाऱ्हाळी गटातून विजयी झालेल्या मंगाराणी आंबुलगेकर यांचे माहेर भोकर विधानसभा मतदारंसघातल्याच पाळज या गावचे आहेत. या दोन नावांवर जोरदार चुरस सुरू आहे. आंबुलगेकर यांच्यावर आपसंपदा जमवल्या प्रकरणी गुन्हा दाखल आहे. दुसरीकडे सविता वारकड यांची पाटी कोरी आहे. लोकसभा निवडणुकीत मुखेड विधानसभा मतदारसंघातून काँग्रेसची जबरदस्त पिछेहाट झाली होती. या सर्व पार्श्वभूमीवर कोणाची वर्णी लागते या बाबत मंगळवारी निर्णय होणार आहे.
राष्ट्रवादी, शिवसेनेला एक-एक सभापतिपद
जिल्हा परिषदेत सध्या काँग्रेस व राष्ट्रवादी काँग्रेसची आघाडी आहे. याच आघाडीत राष्ट्रवादीला उपाध्यक्षपदासह दोन सभापतीपदे मिळाली होती. नव्या महाआघाडीत राष्ट्रवादीला केवळ एका सभापतीपदावर समाधान मानावे लागणार आहे. गेल्या तीन वर्षांपासून विरोधात असलेल्या शिवसेनेनला एक सभापतीपद देण्याचे निश्चित झाले आहे. या पदासाठी माजी आमदार सुभाष साबने यांच्या स्नुषा भाग्यश्री साबने, बबन बारसे व विजय बास्टेवाड यांच्यात चुरस आहे. मंगळवारी सकाळी पदाधिकाऱ्यांच्या निवडीसाठी विशेष सभेचे आयोजन करण्यात आले आहे.