म. टा. प्रतिनिधी, पिंपरी
भारतीय जनता पक्षाचे सरकार पूर्णतः अपयशी ठरल्याचा दावा करीत महागाई आणि महिलांवरील वाढत्या अत्याचाराच्या विरोधात सोमवारी राष्ट्रवादी काँग्रेसच्या पिंपरी-चिंचवड विभागाने आंदोलन करून तहसीलदारांना निवेदन दिले.
केवळ आश्वसाने देऊन जनतेची फसवणूक केल्याचा आरोप करीत पक्षाचे शहराध्यक्ष संजोग वाघेरे-पाटील आणि पदाधिकाऱ्यांनी दिलेल्या निवेदनात म्हटले आहे, 'पेट्रोल, डिझेल आणि गॅसचे दर गगनाला भिडले आहेत. त्यामुळे सर्वसामान्यांचे बजेट कोलमडले आहे. राज्यात मोठ्या प्रमाणात वीज टंचाई असून, लोड शेडिंगचा प्रश्न भेडसावत आहे. औद्योगिक भागात उद्योजकांचे आर्थिक नुकसान होत आहे. भारनियमनामुळे नागरिक आणि विद्यार्थ्यांचे हाल होत आहेत. राज्यातील कायदा आणि सुव्यवस्थेचे धिंडवडे निघाले आहेत. अल्पवयीन मुली आणि महिलांवरील अत्याचारांमध्ये वाढ झाली आहे. वाढती गुन्हेगारी तसेच गाड्यांची होणारी तोडफोड करणाऱ्यांवर कडक कारवाई करण्यात यावी. यासाठी राज्याला पूर्णवेळ आणि स्वतंत्र गृहमंत्री देण्यात यावा.'
खड्डे पडलेल्या रस्त्यांची कामे हाती घ्यावीत, साथीच्या आजारांवर प्रतिबंधात्मक उपाययोजना राबवाव्यात, पिंपरी-चिंचवडमधील प्रलंबित प्रश्नांची सोडवणूक करावी, या मागण्यांसह धडक कृतीची अपेक्षा व्यक्त करण्यात आली आहे. अन्यथा, भविष्यात तीव्र आंदोलन करू, असा इशारा निवेदनात देण्यात आला आहे.
....