चार उड्डाणपूल, दोन भुयारी मार्ग उभारणार

वडगाव ते लोणीकंद महामार्ग आराखडा अंतिम टप्प्यात; रस्ता चौपदरी होणार

पुणे : पुणे-बेंगळुरू महामार्ग आणि पुणे-सोलापूर महामार्गाला जोडणाऱ्या वडगाव येथील नवले पूल ते लोणीकंदपर्यंतच्या ४५ किमी रस्त्याच्या सविस्तर प्रकल्प आराखड्याचे (डीपीआर) ८५ टक्के काम झाले आहे. हा रस्ता दोन टप्प्यात होणार असून, नवले पूल ते वडकीनाला पर्यंतचा रस्ता सहा पदरी आणि वडकीनाला ते लोणीकंदचा रस्ता चौपदरी केला जाणार आहे. यापैकी वडकीनाला ते लोणी काळभोर येथील थेऊर फाटा या रस्त्याची संपूर्ण आखणी झाली असून, चार उड्डाणपूल, दोन पादचारी भुयारी मार्ग आणि एक ग्रेड सेपरेटरचा समावेश असण्याची शक्यता आहे.

राष्ट्रीय महामार्ग प्राधिकरणाने नवले पूल ते लोणीकंद हा ४५ किमीचा रस्ता राष्ट्रीय महामार्ग म्हणून यापूर्वीच घोषित केला आहे. डिसेंबर २०१६ मध्ये या रस्त्याचा डीपीआर तयार करण्याचे आदेश देण्यात आले होते. सद्यस्थितीत ‘डीपीआर’चे काम ८५ टक्के पूर्ण झाले आहे. या रस्त्यापैकी नवले पूल ते कात्रज हा पूर्वीचा महामार्गाचा रस्ता अस्तित्त्वात आहे. कात्रज ते खडी मशिन चौक (कोंढवा बुद्रुक) हा रस्ता पालिकेच्या अखत्यारित आहे. खडी मशिनपासून पुढील रस्ता सार्वजनिक बांधकाम विभागाच्या (पीडब्ल्यूडी) अखत्यारित आहे. विकास आराखड्यामध्ये प्रस्तावित खडी मशिन ते मंतरवाडी रस्त्याची आखणी मूळ रस्त्याच्या आजूबाजूलाच होती. ती महामार्गामध्ये बदलण्यात आली आहे. खडी मशिनपासून पिसोळीपर्यंत रस्ता काही प्रमाणात कायम आहे. तेथून पिसोळीच्या उत्तेरने आणि त्यापुढे उंड्रीपासून दक्षिणेकडून वडकीपर्यंत आखणी करण्यात आली आहे. वडकीनाला ते थेऊर फाटा हा साडेदहा किमीचा रस्ता पूर्णपणे नवीन केला जाणार आहे. तर, थेऊर फाट्यापासून लोणीकंद अशी आखणी केली आहे. ‘डीपीआर’चे काम या आठवड्यात पूर्ण होण्याची शक्यता आहे. येत्या महिनाभरात या कामाचा संपूर्ण अहवाल सादर केला जाणार आहे.

..

कात्रज-कोंढवा रस्त्याचे काय?

कात्रज-कोंढवा रस्त्याच्या रुंदीकरणासाठी महापालिका प्रशासनाने गेल्या वर्षी टेंडर प्रक्रिया राबविण्याचा निर्णय घेतला होता. मात्र, त्यामध्ये गोंधळ झाल्याने ती रद्द करण्याचा निर्णय घेण्यात आला. नवले पूल ते लोणीकंद या रस्त्यामध्ये कात्रज-कोंढवा रस्त्याचा समावेश आहे. त्यामु‍ळे हा रस्ता कोणी विकसित करायचा, असा प्रश्न उपस्थित झाला. राष्ट्रीय महामार्ग विभागाने याबाबत महापालिका प्रशासनाकडे विचारणा केली. महापालिकेच्या प्रतिसादावर पुढील निर्णय घेतला जाणार आहे.

.......................

सर्वेक्षणही पूर्ण

वडकीनाला ते थेऊर फाटा या दरम्यान रेल्वे क्रॉसिंग आणि दोन कॅनॉलवर असे तीन उड्डाणपूल प्रस्तावित आहेत, तर दोन पादचारी भुयारी मार्ग प्रस्तावित आहेत. याबरोबरच कात्रज चौकात उड्डाणपूल आणि ग्रेडसेपरेटरबाबत चाचपणी सुरू आहे. यासाठी आवश्यक सर्वेक्षण करण्यात आले आहे, अशी माहिती वरिष्ठ अधिकाऱ्यांनी दिली.