rohit pawar : भाजपचे नेते म्हणजे पोपट आणि शहामृग; 'या' पवारांची टोलेबाजी

पुणे: राष्ट्रवादी काँग्रेसचे नेते जितेंद्र आव्हाड यांनी इंधन दरवाढीवरून भाजप नेते आणि बॉलिवूड सेलिब्रिटींना घेरलेले असतानाच आता राष्ट्रवादीचे आमदार रोहित पवार यांनीही भाजपवर हल्ला चढवला आहे. रोहित पवार यांनी भाजप नेत्यांना थेट पोपट आणि शहामृगाची उपमा देऊन टीकास्त्र सोडलं आहे.

रोहित पवार यांनी ट्विट करून भाजप नेत्यांना इंधन दरवाढीवरून घेरले आहे. महाराष्ट्र विकास आघाडीवर राजकीय टीका करताना पोपटासारखे बोलणारे राज्यातील भाजपचे सर्व नेते सामान्यांसाठीच्या महत्त्वाच्या इंधन दरवाढीवर मात्र न बोलता वादळात वाळूत तोंड खुपसून बसणाऱ्या शहामृगाच्या भूमिकेत जातात. केंद्रात तुमचं काही चालत नाही की तिथं बोलायला घाबरता? असा सवाल करतानाच मूग गिळून गप्प बसण्याचं स्पष्टीकरण जनतेला द्या, असंही पवार यांनी म्हटलं आहे.

यावेळी त्यांनी राष्ट्रवादीमध्ये प्रवेश केलेल्या पारनेरच्या पाच नगरसेवकांच्या बाबतीतही भूमिका स्पष्ट केली. हे पाचही नगरसेवक दुसऱ्या पक्षात जाणार होते. त्याचा आघाडीवर दुष्परिणाम झाला असता म्हणून या पाचही नगरसेवकांना राष्ट्रवादीत प्रवेश देण्यात आल्याचं पवार म्हणाले.


फेरीवाल्याचं काय होणार?; राज्य सरकारनं कोर्टाला स्पष्टच सांगितलं

काय म्हणाले होते आव्हाड...

दरम्यान, काही दिवसांपूर्वी जितेंद्र आव्हाड यांनी ट्विट करून थेट अमिताभ बच्चन यांनाच घेरले होते. तुम्ही पेट्रोल पंपावर कारमध्ये इंधन भरत नाहीत का? तुमच्या हातात येणारं इंधनाचं बिलही तुम्ही पाहत नाही का? आता तुम्ही बोललंच पाहिजे. हीच ती वेळ आहे. ती निश्चितच पक्षपाती नसाल, असा चिमटाही आव्हाड यांनी बच्चन यांना काढला होता. डिझेल आणि पेट्रोलचे दर गगनाला भिडले आहेत. अब मुंबईकर क्या करे कार जलाये या कार चलाये? असा अमिताभ यांच्याच स्टाइलमध्ये खोचक सवालही त्यांनी केला होता.

करोना फैलावणाऱ्या चीनला मुंबईने टाकले मागे; रुग्णसंख्या आणि मृतांचा आकडाही मोठा

आव्हाड यांनी अभिनेता अक्षय कुमारलाही इंधन दरवाढीवरून खोचक प्रश्न विचारले होते. 'अक्षय, तू ट्विटरवर सक्रिय नाहीस का?... तू कार वापरणं बंद केलंस का?... तू वर्तमानपत्र वाचत नाहीस का?... तुझ्या माहितीसाठी सांगतो की देशात पेट्रोल, डिझेलच्या किंमती प्रचंड वाढल्या आहेत,' असं आव्हाड यांनी आपल्या ट्विटमध्ये म्हटलं होतं. अक्षय कुमारनं सध्याच्या महागाईवरही व्यक्त व्हावं, अशी अपेक्षा त्यांनी या माध्यमातून व्यक्त केली होती. त्यामुळे आव्हाड आता काँग्रेसच्या काळात इंधन दरवाढीवरून घेरणाऱ्या सेलिब्रिटींना रोज डिवचण्याचा प्रयत्न करत असल्याचं दिसून येत आहे. त्यावेळी अभिनेते अनुपम खेरसह अनेकांनी ट्विट करून इंधन दरवाढीविरोधात संताप व्यक्त केला होता.

पुणे: करोनाबाधितानं क्वारंटाइन सेंटरमध्येच घेतला गळफास