पुणे : 'करोना'चा सामना करण्यासाठी केंद्र आणि राज्य सरकारतर्फे विविध पावले उचलण्यात येत असून, राष्ट्रवादी काँग्रेसचे खासदार आणि राज्यातील सर्व आमदार त्यांचे एक महिन्याचे वेतन पंतप्रधान आणि मुख्यमंत्री सहायता निधीसाठी देण्याचा निर्णय पक्षाध्यक्ष शरद पवार यांनी घेतला आहे. 'या संकटकाळात केंद्र व राज्य सरकारतर्फे घेण्यात येणाऱ्या विविध उपाययोजनांसाठी राष्ट्रवादी काँग्रेस पूर्णत: जनतेसोबत ठाम उभी आहे,' असेही पक्षातर्फे स्पष्ट करण्यात आले आहे. केंद्रीय अर्थमंत्री निर्मला सीतारामन यांनी देशातील गोरगरीब जनतेसाठी तब्बल १ लाख ७० हजार कोटी रुपयांच्या पॅकेजची घोषणा गुरुवारी केली. राज्य सरकारतर्फेही 'करोना'चा संसर्ग रोखण्यासाठी पावले टाकण्यात येत आहेत. त्यामुळे सामाजिक जबाबदारीच्या माध्यमातून विधिमंडळ आणि विधान परिषदेतील सर्व आमदारांचे एक महिन्याचे वेतन 'मुख्यमंत्री सहायता निधी'साठी; तर लोकसभा व राज्यसभेतील सदस्यांचे एक महिन्याचे वेतन 'पंतप्रधान सहायता निधी'साठी देण्याचा निर्णय घेण्यात आला आहे. त्यानुसार सर्व सदस्यांनी संबंधित धनादेश प्रदेशाध्यक्ष जयंत पाटील यांच्याकडे जमा करावेत, अशा सूचना पवार यांनी सर्व खासदार-आमदारांना दिल्या आहेत.
राष्ट्रवादी काँग्रेसचा मदतीचा हात
'करोना'चा सामना करण्यासाठी केंद्र आणि राज्य सरकारतर्फे विविध पावले उचलण्यात येत असून, राष्ट्रवादी काँग्रेसचे खासदार आणि राज्यातील सर्व आमदार त्यांचे ...
महाराष्ट्र टाइम्स.कॉम 27 Mar 2020, 4:00 am