नीलम गोऱ्हे यांना सेनेकडून उमेदवारी?

पुणे: शिवसेना आणि भाजपची युती न झाल्यास शिवसेनेतर्फे पुणे लोकसभा मतदारसंघातून विधान परिषदेच्या आमदार डॉ. नीलम गोऱ्हे यांना रिंगणात उतरविले जाण्याची शक्यता आहे. शिवसेनेचे माजी शहराध्यक्ष विनायक निम्हण यांच्या नावाचीही लोकसभेसाठी चर्चा आहे. मात्र, त्यांना काँग्रेसकडून लोकसभा लढविण्यासाठी निमंत्रण दिल्याची राजकीय वर्तुळात जोरदार चर्चा असल्याने गोऱ्हे यांचे नाव आघाडीवर असल्याचे समजते.

आगामी लोकसभा निवडणुकीत शिवसेनेने स्वबळाचा नारा दिला असल्याने त्यांच्याकडून पुणे लोकसभेसाठी उमेदवारांची चाचपणी सुरू आहे. शिवसेना नेते खासदार संजय राऊत हे सातत्याने पुण्याचा दौरा करत असून, लोकसभा निवडणूक लढविण्यासाठी आवश्यक तयारी करत आहेत. या पार्श्वभूमीवर गोऱ्हे यांच्या उमेदवारीला पक्षाकडून हिरवा कंदील दाखविला जाण्याची शक्यता अधिक आहे. गोऱ्हे यांना मुंबईतील निवडणुकांची जबाबदारी देण्यात आली असली, तरी त्यांना पुण्यातून लढविण्याची शक्यता अधिक असल्याची चर्चा शिवसेनेच्या गोटात आहे.