महिलांना वर्षभर सन्मान मिळावा : गोऱ्हे

पुणे : ‘महिला दिनाच्या निमित्ताने त्यांचा सन्मान होतो, ही स्वागतार्ह बाब असली तरी महिलांना वर्षभर सन्मान मिळाला पाहिजे. पुरुषांनीदेखील पुढे येऊन महिलांच्या समान अधिकारासाठी लढले पाहिजे. ज्या दिवशी महिलांना पूर्णपणे हिंसाचारमुक्त जीवन आणि सन्मानाने जगता येईल तोच खरा महिला दिन असेल,’ असे मत आमदार डॉ. नीलम गोऱ्हे यांनी व्यक्त केले.

पुणे महापालिकेतील स्वच्छता विभागातील महिला कर्मचाऱ्यांचा ग्राहक संरक्षण संस्थेतर्फे डॉ. गोऱ्हे यांच्या हस्ते सन्मान करण्यात आला. या वेळी त्या बोलत होत्या. नगरसेविका रूपाली पाटील-ठोंबरे, प्रभाग समिती अध्यक्ष कसबा विश्रामबागवाडा दिलीप काळोखे, संस्थेचे अध्यक्ष सागर शिंदे, सुरेश पंडित, अर्चना भोसले आदी या वेळी उपस्थित होते.

‘आपल्या घराची जबाबदारी सांभाळत महिला काम करत असतात. स्वच्छता करणाऱ्या महिलांना बऱ्याच वेळा अनेक तक्रारी ऐकाव्या लागतात. परंतु समाज प्रवृत्तीकडे दुर्लक्ष करीत त्या आपले काम निष्ठेने करत असतात. अशा महिलांचा सत्कार करणे ही कौतुकाची गोष्ट आहे. समाजापुढे आपले मत निर्भीडपणे मांडता आले पाहिजे. अनेक क्षेत्रात महिला पुरुषांबरोबर काम करताना दिसतात. परंतु राजकारणातदेखील महिलांनी उतरले पाहिजे,’ असे गोऱ्हे यांनी सांगितले. ठोंबरे यांनी मनोगत व्यक्त केले. जतीन पांडे यांनी सूत्रसंचालन केले. सुरेखा होले यांनी प्रास्ताविक केले.