​‘नीट’ परीक्षा प्रादेशिक भाषांतही

पुणे ः देशात वैद्यकीय पदवी आणि पदव्युत्तर अभ्यासक्रमाच्या प्रवेशासाठी आवश्यक असणारी ‘नीट’ (राष्ट्रीय पात्रता व प्रवेश परीक्षा) परीक्षा पुढील वर्षापासून प्रादेशिक भाषेतही होणार असल्याची माहिती केंद्रीय आरोग्य राज्यमंत्री अनुप्रिया पटेल यांनी शुक्रवारी लोकसभेत दिली. त्यामुळे नीट परीक्षा इंग्रजी आणि हिंदीसह आता मराठी भाषेत होण्याची शक्यता आहे.
नीट परीक्षेसंदर्भात लोकसभेत प्रश्न विचारण्यात आला होता. त्यावेळी पटेल यांनी सांगितले की, २०१७ मध्ये होणारी नीट परीक्षा इंग्रजी आणि हिंदीसह प्रादेशिक भाषांमध्येही होणार आहे. पुढील वर्षी ही परीक्षा मराठी, आसामी, बंगाली, गुजराती, तमिळ, तेलगूमध्ये घेण्याची मुभा केंद्र सरकारने दिली आहे. या निर्णयामुळे राज्य सरकारांच्या आरक्षणाबाबतच्या धोरणाला कोणताही धक्का लागणार नाही असे देखील त्यांनी स्पष्ट केले. ‘इंडियन मेडिकल कौन्सिल अॅक्ट, १९५६मधील सेक्शन १० डी’नुसार, हिंदी, इंग्रजीसह इतर प्रादेशिक भाषांमध्येही ही परीक्षा देता येणार आहे. सीबीएसई आणि मेडिकल कौन्सिल ऑफ इंडिया यांचा नीट प्रादेशिक भाषांमध्ये घेण्याला विरोध होता. पेपर फुटण्याची भीती असल्याचे सीबीएसईचे म्हणणे आहे; तसेच वैद्यकीय अभ्यासक्रमाची पुस्तके इंग्लिश वगळता अन्य भाषांमध्ये उपलब्ध नसल्याने हा पर्याय योग्य नसल्याचे एमसीआयने स्पष्ट केले आहे.