म. टा. प्रतिनिधी, पुणे
संरक्षण मंत्रालयाच्या आदेशानंतर पुणे कँटोन्मेंटच्या हद्दीतील खुले झालेले एलिट लाइन्स, राइट फ्लँक आणि खडकी कँटोन्मेंटच्या हद्दीतील संगमवाडी ते डेक्कन कॉलेज हे रस्ते बंद करण्याचा अहवाल स्थानिक लष्करी प्रशासनाने (एलएमए) तयार केला असून तो संरक्षण मंत्रालयाकडे पाठविण्यात येणार असल्याची माहिती सूत्रांनी दिली. हे रस्ते खुले केल्याने सुरक्षिततेस धोका उद्भवतो, असा जुनाच दावा एलएमएने केल्याचे समजते. त्यामुळे या रस्त्यांबाबत आता संरक्षण मंत्रालय अंतिम निर्णय घेणार असून त्याबाबतची कार्यपद्धती (स्टँडर्ड ऑपरेटिंग प्रोसिजर) लवकरच जारी होण्याची शक्यता आहे.
देशभरातील ६२ कँटोन्मेंटमध्ये स्थानिक लष्करी प्रशासनाने बंद केलेले रस्ते खुले करण्याचा निर्णय संरक्षण मंत्रालयाने महिन्याभरापूर्वी घेतला. त्यानुसार, पुणे कँटोन्मेंट बोर्डाच्या हद्दीतील घोरपडी पसिरातील एलिट लाइन्स, वानवडी परिसरातील राइट फ्लँक हे दोन रस्ते खुले करण्यात आले होते, तर खडकी कँटोन्मेंट बोर्डाच्या हद्दीतील संगमवाडी ते डेक्कन कॉलेज रस्ता खुला करण्यात आला होता. हे रस्ते खुले करण्याची अनेक वर्षांपासून प्रलंबित मागणी पूर्ण झाल्याने नागरिकांनी आनंदही व्यक्त केला होता. त्यानंतर या रस्त्यांवरील वाहतुकीचा महिनाभर आढावा घेऊन त्याचा अभिप्राय संरक्षण मंत्रालयाकडे पाठविण्याच्या सूचना स्थानिक लष्करी प्रशासनाला करण्यात आल्या होत्या. कँटोन्मेंट बोर्डालाही या रस्त्यांबाबतचा अभिप्राय पाठविण्याचे निर्देश संरक्षण मालमत्ता विभागाने दिले होते.
नुकतेच संरक्षण मंत्रालयाने सर्व कँटोन्मेंटमधील स्थानिक लष्करी प्रशासनाला प्रश्नावली जारी करून संबंधित रस्त्यांवरील वाहतुकीची माहिती देण्यास सांगितले होते. त्यानुसार लष्करी प्रशासनाने तीनही रस्त्यांवरील वाहतुकीचा आढावा घेतला आहे. त्यासाठी संबंधित रस्त्यांवर काही दिवसांपूर्वी लष्करी कर्मचाऱ्यांना तैनात करण्यात आले होते. रस्त्यांवरील वाहतूक, वाहनांची संख्या, गर्दीची वेळ याचा तपशील नोंदविण्यात आला आहे. या रस्त्यांवरील लष्करी संस्थांच्या सुरक्षिततेचे कारण देत लष्कराने नकारात्मक अहवाल तयार केल्याची माहिती बोर्डातील सूत्रांनी दिली आहे. दरम्यान, रस्ते सुरू ठेवण्यास लष्करी प्रशासन नकारात्मक असले, तरी संरक्षण मंत्री आणि संरक्षण मालमत्ता विभाग याबाबत सकारात्मक आहे. त्यामुळे हे रस्ते खुले राहतील, असे बोर्डाच्या एका सदस्याने नाव न छापण्याच्या अटीवर सांगितले.