म. टा. प्रतिनिधी, पुणे
चारित्र्याच्या संशयावरून पतीने पत्नीचा गळा दाबून खून करण्याचा प्रयत्न केल्याच्या प्रकरणात त्वरीत तपास करून अहवाल सादर करण्याचा आदेश कँटोन्मेंट कोर्टाने पोलिसांना दिला आहे. प्रथमवर्ग न्यायदंडाधिकारी ओ. एस. साने यांच्या कोर्टाने हा आदेश दिला.
पीडित महिलेने कोंढवा पोलिसांकडे या प्रकरणी तक्रार अर्ज दिला होता. मात्र, त्यावर वेळीच कारवाई न करण्यात आल्यामुळे तिने कोर्टात दावा दाखल केला. तिचा पती तोहिद मज्जीद मारुफ (वय ३६, रा. कोंढवा खुर्द) याच्याविरुद्ध तिने अर्ज केला होता. त्यांचे जून २०१६मध्ये लग्न झाले. लग्नाच्या काही महिन्यानंतरच त्यांच्यात वाद सुरू झाले. तोहिद रागाच्या भरात तिला मारहाण करत असे. तसेच, तिच्या चारित्र्यावर संशयही घेत असे. त्याने फिर्यादींचा दोनदा गळा दाबून खून करण्याचा प्रयत्न केला. रिक्षा घेण्यासाठी माहेरहून दोन लाख रुपये आणण्यासाठी तो तिला सांगत असे आणि तिचा छळ करत असे. याआधी तोहिदने पत्नीकडून दीड लाख रुपये घेतले होते. त्याने तिला घराबाहेर काढून घटस्फोट देण्याचीही धमकी दिली होती. त्याच्या त्रासाला कंटाळून तिने कोंढवा पोलिसांत तक्रार दिली. मात्र, पोलिसांनी वेळीच कारवाई न केल्याने पीडितीने अॅड. साजिद शहा यांच्यामार्फत कोर्टाकडे दाद मागितली. कोर्टाने या प्रकरणी पोलिसांना तपास करण्याचा आदेश दिला.