गरम पाण्यामुळे बाळ गंभीर जखमी

अंघोळीला नेताना वडिलांच्या हातून निसटले

म. टा. प्रतिनिधी, हडपसर

अंघोळ घालण्यासाठी घेऊन जाताना फरशीवरील पाण्यात वडिलांचा पाय घसरल्याने २६ दिवसांचे बाळ भाजल्याची घटना कोंढव्यात घडली आहे. या घटनेत बाळ ९० टक्के भाजले आहे.
पापा सगीर शेख (रा. सुमित्रा अपार्टमेंट,भाग्योदयनगर, कोंढवा) असे बाळाचे नाव आहे. सगीर मजहीर शेख ( वय ४८ रा. गल्ली न.३, सुमित्रा अपार्टमेंट,भाग्योदयनगर, कोंढवा) फरशीवरून घसरून पडल्याने अपघात झाला.
कोंढवा पोलिस ठाण्याचे सहायक पोलिस निरीक्षक संतोष तासगावकर यांनी दिलेल्या माहितीनुसार सगीर शेख भाग्योदयनगर येथे राहतात. त्यांना तीन मुली आहेत. रोज शेख आणि त्यांची पत्नील मुलाला तेल लावून अंघोळ घालत. बुधवारी सकाळी नेहमीप्रमाणे शेख यांनी बाळाला अंघोळ घालण्यासाठी बादलीत पाणी तापवायला ठेवले होते. पाणी तापवल्यावर बाळाला उचलून सगीर बाथरूमच्या दिशेने जात होते. तेवढ्यात फरशीवर पाणी पडल्याने त्यांचा पाय घसरला आणि ते खाली पडले. त्यासोबत बाळही फरशीवर पडले. मात्र, तिथेच जवळ असलेल्या गरम पाण्याच्या बादलीला धक्का लागल्याने बादलीतील उकळते पाणी बाळाच्या अंगावर पडले. बाळाची त्वचा कोवळी असल्याने त्याच्या हाताला, पायाला, छातीला डोक्याला गंभीर जखमा झाल्या. अंगावर पाणी पडताच क्षणी बाळ मोठ्याने ओरडले आणि गप्प झाले. सगीर यांनी तत्काळ बाळाला ससून हॉस्पिटलमध्ये दाखल केले. गंभीर भाजल्याने डॉक्टरांनी बाळावर तत्काळ उपचार सुरू केले. बाळ ९० टक्के भाजल्याचे ससूनच्या डॉक्टरांनी सांगितले. याबाबत कोंढवा पोलिस ठाण्यात नोंद करण्यात आली आहे. सगीर शेख मौलाना असून, कोंढवा परिसरात लहान मुलांची शिकवणी घेतात.