म. टा. प्रतिनिधी, पुणे
सध्याचे माहिती तंत्रज्ञानाचे युग आणि प्रचंड मोठ्या प्रमाणावर निर्माण होणारा माहितीसाठा लक्षात घेऊन, फर्ग्युसन महाविद्यालयाने एमएससी डेटा सायन्स अभ्यासक्रम सुरू केला आहे. यासाठी ३० विद्यार्थ्यांना प्रवेश दिला जाईल.
डेक्कन एज्युकेशन सोसायटीच्या नियामक मंडळाचे अध्यक्ष डॉ. शरद कुंटे व फर्ग्युसनचे प्राचार्य डॉ. रवींद्रसिंह परदेशी यांनी पत्रकार परिषदेत ही माहिती दिली. उपप्राचार्या स्वाती जोगळेकर, आदेश गोखले या वेळी उपस्थित होते. हा अभ्यासक्रम दोन वर्षांचा (चार सेमिस्टर्स) आहे. त्यासाठी ३० जून रोजी प्रवेशपरीक्षा घेण्यात येणार आहे. हा अभ्यासक्रम सुरू करणारे सावित्रीबाई फुले पुणे विद्यापीठाशी संलग्न असलेले फर्ग्युसन महाविद्यालय हे पहिलेच महाविद्यालय आहे. या अभ्यासक्रमासाठी सांख्यिकी, गणित अथवा संगणकशास्त्र पदवीधर किंवा समकक्ष विद्यार्थी पात्र आहेत. अभ्यासक्रमानंतर डेटा सायंटिस्ट, डेटा अॅनॅलिस्ट, क्वांटिटिव्ह अॅनॅलिस्ट, क्वांटिटिव्ह रिसर्चर, मशीन लर्निंग इंजिनिअर, बिग डेटा इंजिनीअर म्हणून संधी मिळू शकते.
'सध्याच्या माहिती तंत्रज्ञानाच्या युगात आपण केलेल्या प्रत्येक 'क्लिक'मुळे दिवसभरात प्रचंड प्रमाणात डेटा तयार होतो. या डेटाचे योग्य विश्लेषण करणे हे कौशल्याचे काम आहे. ट्रेंडचे विश्लेषण करण्यासाठी, योजना बनविण्यासाठी, धोरणे बनविण्यासाठी आणि समाजाच्या विकासासाठी या डेटाचा वापर करता येऊ शकतो. त्यासाठी तज्ज्ञ डेटा विश्लेषकांची गरज आहे. त्यासाठीच या अभ्यासक्रमाची निर्मिती करण्यात आली आहे,' असे डॉ. परदेशी म्हणाले. 'महाविद्यालय स्वायत्त असल्याने स्वतंत्र अभ्यासक्रम सुरू करण्याची आम्हाला मुभा आहे. त्यासाठी या क्षेत्रातील तज्ज्ञांच्या मदतीने अभ्यासक्रम निश्चित केला आहे. त्याचबरोबर तज्ज्ञच हा अभ्यासक्रम शिकवणार आहेत; याशिवाय आघाडीच्या उद्योगांमधील 'इंटर्नशीप' बंधनकारक असल्याने विद्यार्थ्यांना कार्यानुभवही मिळेल,' असेही ते म्हणाले.
डेटा सायन्स सांख्यिकी, गणिती आणि सॉफ्टवेअर प्रोग्रामिंग या शाखांवर आधारित आहे. हे शास्त्र कच्च्या डेटातून अर्थपूर्ण माहिती तयार करते. यामुळे योग्य निर्णय घेण्यास मदत होते. विविध उद्योगात डेटा शास्त्रज्ञांची प्रचंड मागणी आहे. डेटा शास्त्रज्ञ हा डेटा एकत्र करण्यासाठी, प्रक्रिया करण्यासाठी, विश्लेषण करण्यासाठी आणि त्यांच्या प्रकल्प उद्दिष्टांनुसार अर्थपूर्ण विश्लेषण आणि आकडेवारी तयार करण्यासाठी जबाबदार असतो. त्यामुळे २१ व्या शतकात 'डेटा सायंटिस्ट' या पदासाठी सर्वाधिक रोजगार संधी उपलब्ध असतील.
- आदेश गोखले