युतीसाठी डेडलाइन नाही

भाजपचे प्रदेशाध्यक्ष रावसाहेब दानवे यांचे सूचक वक्तव्य

म. टा. प्रतिनिधी, पुणे

भारतीय जनता पक्ष आणि शिवसेना यांच्यात युतीसाठी कोणतीही डेडलाइन नाही; युती अखेरच्या क्षणापर्यंत होऊ शकते, असे सूचक वक्तव्य भाजपचे प्रदेशाध्यक्ष रावसाहेब दानवे यांनी सोमवारी केले. सामंजस्याने जागा वाटपावर तोडगा निघेल, तिथे युती होईल; अन्यथा आम्ही स्वबळावर लढू, असे संकेतही त्यांनी दिले. तसेच, राजकारणात प्रतीक्षा करायला लावणे म्हणजे एक प्रकारची फसवणूकच आहे, असा टोलाही त्यांनी शिवसेनेचे नाव न घेता लगावला.
भाजपच्या बैठकीसाठी पुण्यात आलेल्या दानवे यांनी पत्रकारांशी बोलताना, ‘युतीबाबत चर्चा सुरू असून, निश्चित निर्णय केव्हा होणार, हे सांगता येणार नाही,’असा खुलासा केला. युतीसाठी शिवसेनेने डेडलाइन दिली असून, मुंबईत युती झाली नाही तर राज्यात इतरत्रही होणार नाही, असा इशारा दिला आहे. त्यावर, आमच्यासाठी कोणतीही डेडलाइन नसून, अखेरच्या क्षणीही युतीचा निर्णय होऊ शकतो, असा दावा दानवे यांनी केला. मुंबईत युती झाली नाही, तरी इतर ठिकाणी दोन्ही पक्षांमध्ये सामंजस्याने जागा वाटपावर तोडगा निघाला तर युती करून लढण्यासाठी आम्ही सकारात्मक आहोत, असे त्यांनी स्पष्ट केले.
मुंबईमध्ये युतीसाठी भाजपने शिवसेनेला दिलेल्या प्रस्तावावर पक्ष अजूनही ठाम असून, त्यानंतर नव्याने कोणताही प्रस्ताव देण्यात आलेला नाही. शिवसेनेकडून आम्हांला प्रतीक्षा असून, त्याचा कालावधी वाढत गेल्यास त्याला फसवणूकच म्हणले जाईल, अशी पुष्टी त्यांनी जोडली.