‘रामटेकडीत कचरा प्रकल्प नको’

म. टा. प्रतिनिधी, हडपसर

रामटेकडी इंडस्ट्रीयल विभागात दोन कचरा प्रकल्प असताना पुन्हा २३ एकर जागेवर नव्याने होऊ पाहणाऱ्या कचरा प्रकल्पाला आमचा विरोध आहे. सरकार एकीकडे उद्योगाच्या विकासाकरिता नवनवीन स्टार्टअप करताना दिसत आहे. मात्र, रामटेकडी इंडस्ट्रीयल विभागामध्ये कचरा प्रकल्प आणून महापालिका आमचे उद्योग बंद करत आहे. उद्योग वाचवण्याकरिता आम्ही कोर्टात तर जाणार आहोतच; त्याअगोदर रस्त्यावर उतरून आंदोलन करणार आहोत, अशी भूमिका रामटेकडी इंडस्ट्रीअल असोशिएशनच्या बैठकीत उद्योजकांनी व नगरसेवकांनी स्पष्ट केली.
आम्ही पालिकेला करोडो रुपये टॅक्स भरूनही आम्हाला सुविधा देण्याऐवजी आमची पदरी कचराच टाकला जात आहे, यामुळे आमचे उद्योग धोक्यात आले आहेत, असे म्हणणे या बैठकीत मांडण्यात आले.
रामटेकडी येथे होऊ पाहणाऱ्या तिसऱ्या कचरा प्रकल्पाच्या विरोधात रामटेकडी इंडस्ट्रीअल असोशिएशनच्या वतीने उद्योजक आणि हडपसर भागातील नगरसेवकांची बैठक आयोजित करण्यात आली होती. यामध्ये उद्योजक व नगरसेवकांनी कचरा प्रकल्पाच्या विरोधात मत व्यक्त केले. रामटेकडी इंडस्ट्रीअल असोसिएशनचे अध्यक्ष प्रमोद डबीर, व्हाइस चेअरमन विकास जगताप, सचिव बालाजी माने, खजिनदार सचिन इनामदार, सहसचिव नितीन शिंगाडे, वसंत येमूल, दीपक देशमुख, हडपसर प्रभाग समिती अध्यक्ष योगेश ससाणे, स्थायी समिती सदस्य आनंद आलकुंटे, मारुती तुपे, नगरसेवक अशोक कांबळे, नगरसेविका रूकसाना इनामदार, माजी नगरसेवक सुनील बनकर यांच्यासह ११० उद्योजक उपस्थित होते. असोशिएशनने पालकमंत्री, मनपा आयुक्त व मुख्यमंत्र्यांना विरोधाचे पत्र दिले आहे, असेही डबीर यांनी सांगितले.
डबीर म्हणाले, ‘रामटेकडी औद्योगिक वसाहतीत अनेक अन्नपदार्थ, पाणी तसेच औषध उद्योग आहेत. त्यांचा व्यवसाय धोक्यात आला आहे. याठिकाणी सध्या अस्तित्वात असलेल्या दोन कचरा प्रकीया प्रकल्पांमुळे अगोदरच मोठे दुष्परिणाम होत आहेत. उद्योग व कर्मचाऱ्यांच्या आरोग्यावर विपरीत परिणाम होत आहे. यापूर्वी न्यायालयात जावून येथील एक प्रकल्प आम्ही बंद केला आहे. नव्याने याठिकाणी कचरा प्रकल्प सुरू करून महापालिकेला वसाहतीची कचरा कुंडी करावयाची आहे का?’
आनंद आलकुंटे म्हणाले, ‘आम्ही सर्वपक्षीय नगरसेवक मनभेद बाजूला ठेवून आयुक्तांना सामूहिक निवेदन देणार आहोत. यासाठी वेळ पडली, तर हजारो नागरिकांसह पुढच्या आठवड्यात रास्ता रोको आंदोलन करू. कोणत्याही परिस्थितीत येथे कचरा प्रकल्प होऊ दिला जाणार नाही.’
योगेश ससाणे म्हणाले, ‘या कचरा प्रकल्पामुळे उद्योजकांसह रामटेकडी, ससाणेनगर, गोसावी वस्ती, हडपसर गाव, गोंधळेनगर, काळेपडळ, सय्यदनगर या भागातील रहिवाशांना खूप त्रास होणार आहे. त्यामुळे या प्रकल्पाची एकही वीट या ठिकाणी लावू देणार नाही. तसेच महापालिका सभागृहात विरोध करणार आहोत.’