'ऑपरेटर' बदलताना 'बॉक्स' बदलण्याची गरज नाही
म. टा. प्रतिनिधी, पुणे
तुम्ही जर एखादी डीटीएच सुविधा किंवा केबल ऑपरेटरने दिलेल्या सेवेला कंटाळला असाल आणि तुम्हाला दुसऱ्या ऑपरेटरची सुविधा हवी असेल, तर आता 'सेट टॉप बॉक्स' बदलण्याची गरज नाही. तुमच्याकडे उपलब्ध असलेल्या सेट टॉप बॉक्सद्वारे तुम्ही कोणतीही सेवा घेऊ शकता. केंद्रीय दूरसंचार नियामक प्राधिकरणाने (ट्राय) 'सेट टॉप बॉक्स इंटरऑपरेबल' संदर्भात डीटीएच आणि केबल कंपन्यांसाठी नव्या सूचना जारी केल्या असून त्या अंतर्गत यापुढे कोणत्याही कंपनीची सेवा वापरण्यासाठी इतर कोणत्याही कंपनीने देऊ केलेला सेट टॉप टॉप बॉक्स वापरता येणार आहे.
काही दिवसांपूर्वी 'ट्राय'ने सर्व केबल ऑपरेटर आणि डीटीएच कंपन्यांकडून यासंदर्भात परिपत्रक काढून सूचना आणि मते मागविली होती. प्रत्येक वेळी डिटीएच किंवा केबल ऑपरेटर बदलायचे झाल्यास, ग्राहकांना त्या कंपनीचा सेट टॉप बॉक्स घेणे बंधनकारक होते. बऱ्याचदा कंपन्या सेट टॉप बॉक्सचे पैसेही आकारायच्या. भारतामध्ये केबल आणि डीटीएच सुविधा वापरण्यासाठी साधारण सारख्याच प्रकारचे सेट टॉप बॉक्स वापरले जातात. त्यामुळे सेट टॉप बॉक्स तोच राहिला, तरी गुणवत्तेत कोणताही फरक पडत नाही. ही बाब लक्षात घेऊन 'ट्राय'ने सेट टॉप बॉक्स इंटरऑपरेबल करण्याचा निर्णय घेतला आहे. त्यामुळे आता उदा. तुमच्याकडे टाटा स्कायची सेवा असेल आणि तुम्हाला एअरटेलची सेवा घ्यायची असेल, तर टाटा स्कायच्या सेट टॉप बॉक्सवरून एअरटेलची सेवा घेणे शक्य होणार आहे. 'ट्राय'कडून लवकरात लवकर ही सुविधा लागू करण्याच्या सूचना कंपन्यांना देण्यात आल्या आहेत.
या निर्णयामुळे ग्राहकांकडून सेट टॉप बॉक्स आणि इतर तांत्रिक बाबींसाठी आकारले जाणारे अतिरिक्त पैसे वाचणार असून, कनेक्शन घेते वेळी ग्राहकांना त्याचा फायदा होणार आहे. डीटीएच ऑपरेटर्सकडून सिग्नलसाठी लावण्यात येणाऱ्या डिशबाबतीतही असा निर्णय होण्याची शक्यता असून पुढील काळात त्यांचाही वापर इंटरऑपरेबल पद्धतीने करता येईल, असे संकेत ट्रायकडून देण्यात आले असून त्यावर काम सुरू असल्याचे स्पष्ट करण्यात आले आहे.
-----------
'सेट टॉप बॉक्स' बंद पडलेल्यांची अडचण
सध्या सगळीकडे लॉकडाउन सुरू आहे. अशा काळात घरातील टीव्ही हा करमणुकीचा मोठा आधार आहे. मात्र, शहरात काही ग्राहकांचे सेट टॉप बॉक्स तांत्रिक बिघाडामुळे खराब झाले असून, लॉकडाउनमुळे त्याची दुरुस्ती होऊ शकत नाहीत. अशा ग्राहकांची मात्र सध्या अडचण होणार आहे.