सेलू येथील ग्रामस्थांच्या बैठकीत ठराव
परभणी : पाथरी हीच श्री साईबाबांची जन्मभूमी आहे. पाथरीकरांनी सुरू केलेल्या आंदोलनाला पाठिंबा आहे, असा महत्त्वपूर्ण ठराव
सेलू येथील श्री साईबाबांचे सद्गुरु श्री केशवराज बाबासाहेब महाराज (व्यंकूशाह) मंदिरात शुक्रवारी (२४ जानेवारी) महाआरतीनंतर आयोजित बैठकीत घेण्यात आला.
माजी आमदार हरिभाऊ लहाने अध्यक्षस्थानी होते. यावेळी नगराध्यक्ष विनोद बोराडे, माजी सभापती अशोक काकडे, जिल्हा परिषद सदस्य राजेंद्र लहाने, गटनेते राम खराबे, सेलू भूषण नंदकिशोर बाहेती, उपनगराध्यक्ष प्रभाकर सुरवसे, मिलिंद सावंत, संतोष कुलकर्णी, रणजीत गजमल, मनीष कदम आदींची प्रमुख उपस्थिती होती.
यावेळी अशोक काकडे म्हणाले, 'हा विषय जात, धर्म, पक्ष, पंथापलिकडचा आस्थेचा आहे. पाथरीला श्री साईबाबांची जन्मभूमी मानायला शिर्डीकरांचा विरोध का ? यामागे फार मोठे राजकारण आणि त्याहीपलीकडे 'अर्थकारण' दडलेले आहे. या राजकीय दबावापोटीच मुख्यमंत्र्यांना विधान बदलावे लागले. हा लढा आता केवळ पाथरीपुरता सिमित न राहता विस्तारत जाणार. पाथरीकरांच्यादृष्टीने हा साईंच्या जन्मस्थळाचा लढा, तर सेलूसाठी साईबाबांच्या सद्गुरूंच्या अस्तित्वाचा, अस्मितेचा लढा आहे. श्री साई कृती विकास समितीचे अध्यक्ष आमदार बाबाजानी दुर्राणी उभारलेल्या या लढ्यात प्रत्येकजण सक्रिय सहभागी होत आहे. श्री साईबाबांच्या जन्मभूमीस्थळावरून पाथरीकरांनी उभारलेल्या या लढ्यात सेलू करांनी शीर्षीस्थानी राहावे व्हावे.'
याप्रसंगी लहाने यांनी लढ्यात एकजूट दाखविण्याचे आवाहन केले. कुलकर्णी, सावंत यांनी मनोगत व्यक्त केले. राखे यांनी सूत्रसंचालन केले.
यावेळी श्री केशवराज बाबासाहेब महाराज संस्थान विश्वस्त समिती, जीर्णोद्धार समिती, साईधाम संस्थान, साई संघर्ष समिती आदींसह सर्व पक्षीय कार्यकर्ते, व्यापारी विविधस्तरातील नागरिक, भाविकांची मोठ्या संख्येने उपस्थिती होती.
साईबाबांचे सद्गुरू श्री केशवराज बाबासाहेब महाराज (व्यंकूशाह) आहेत, हे आम्हाला जसे कळते तसे आम्ही ऐकत आलो आहोत. त्यामुळे साईंचे आणि आमचे नाते खूप जवळचे आहे. पाथरी तर साईंची जन्मभूमीच आहे. त्यामुळे पाथरीकरांच्या आंदोलनाला पाठिंबा म्हणून लवकरच सेलू (सद्गुरू भूमी) ते पाथरी (जन्मभूमी) अशी पायी दिंडी काढण्यात येणार असल्याबाबत आमदार मेघना बोर्डीकर यांच्याशी चर्चा झालेली आहे. यामध्ये सेलू तालुकावासीयांनी मोठ्या संख्येने सहभागी व्हावे.
- विनोद बोराडे, नगराध्यक्ष, सेलू, जि.परभणी
फोटो ओळी :
सेलू येथील श्री साईबाबांचे सद्गुरू श्री केशवराज बाबासाहेब महाराज (व्यंकुशाह) मंदिरात शुक्रवारी महाआरतीनंतर आयोजित ग्रामसभेत मार्गदर्शन करताना जिल्हा परिषदेचे माजी सभापती अशोक काकडे.