म. टा. प्रतिनिधी, पुणे
कच्च्या तेलाचे दर वाढल्याचा परिणाम बाजारातील खाद्य तेलाच्या किमतीवरीही दिसून येत आहे. पामतेल, सोयाबीन आणि सूर्यफुल तेलाच्या किमती वाढल्या आहेत. यांसह पुरवठ्याच्या तुलनेत मागणी घटल्याने शेंगदाणा आणि साबुदाण्याचे दर घटले आहेत. तर, बाजारात गुळाची आवक वाढल्याने गुळाच्या दरातील घसरण कायम आहे. उर्वरित मालाचे दर मागील आठवड्याच्या तुलनेत स्थिर आहेत, अशी माहिती भुसार व्यापाऱ्यांनी दिली.
गेल्या महिनाभरात पाम तेलाच्या १५ किलोच्या डब्याच्या दरात २७० रुपयांनी वाढ झाली आहे. सोयाबीनच्या दरात १०० रुपये आणि सूर्यफुल तेलाच्या दरात ५० रुपयांनी वाढ झाली आहे. शेंगदाणा, रिफाइंड, सरकी, वनस्पती, खोबरेल तेलाचे दर स्थिर आहेत. बाजारात शेंगदाणा आणि साबुदाण्याची आवक वाढली असून, त्या तुलनेत मागणी नसल्याने शेंगदाण्याच्या क्विंटलच्या दरात २०० रुपये आणि साबुदाण्याच्या दरात १५० रुपयांनी घट झाली आहे. गुळाची आवक वाढली आहे. मात्र, मागणीत वाढ झालेली नाही. त्यामुळे गुळाच्या दरातील मंदी कायम आहे; तसेच, गुळ, तूर, हरभरा, मूग, मसूर, मटकी, उडीद आदी प्रकारच्या डाळी, हरभरा, हुलगा, चवळी, मसूर, मूग, मटकी, वाटाणा आदी प्रकारची कडधान्य आणि भगर, हळद, लाल मिरच्या, पोहे, भाजकी डाळ, भडंग, रवा, मैदा, आटा, बेसन, खोबरे नारळ यांचे दर मागील आठवड्याच्या तुलनेत स्थिर आहेत.
\Bबाजरी, तांदळाचा नवीन हंगाम\B
बाजरी आणि तांदळाचा नवीन हंगाम सुरू झाला आहे. मात्र, ग्राहक नसल्याने त्यांच्या दरात बदल झालेला नाही. उकडा, मसुरी, सोना मसुरी, कोलम, लचकारी, चिन्नोर, ११२१, इंद्रायणी, आंबेमाहोर, बासमती अखंड, दुबार, तिबार, मोगरा, कणी, सेला बासमती आदी प्रकारचा तांदूळ बाजारात दाखल झाला आहे. तर, दुरी, वसंत, बाजरी, महिको, गावरान, हायब्रीड आदी प्रकारची ज्वारी व बाजरी दाखल झाली आहे.