ओमिक्रॉनची धास्ती घेतलेल्या पुणेकरांना मोठा दिलासा! महापालिकेनं दिली 'ही' माहिती

पुणे: 'ओमायक्रॉन' हा करोनाचा घातक विषाणू सापडलेल्या दक्षिण आफ्रिका, बोत्स्वाना आणि झिम्बाब्वे या 'हाय रिस्क' देशांतून अद्याप कोणताही प्रवासी पुण्यात आला नसल्याचे पुणे महापालिकेच्या आरोग्य विभागातर्फे सांगण्यात आले. मात्र, खबरदारी म्हणून परदेशांतून मुंबई विमानतळावर आलेल्या ३९३ आणि पुणे विमानतळावर आलेल्या ४२ प्रवाशांची 'आरटी-पीसीआर' चाचणी व त्यांचे 'कॉन्टॅक्ट ट्रेसिंग' करणे आरोग्य विभागाने सुरू केले आहे.

वाचा: पुणे रेल्वे स्थानकावरील भार हलका करण्यासाठी मध्य रेल्वेचा मोठा निर्णय

'ओमायक्रॉन'च्या धोक्याच्या पार्श्वभूमीवर, राज्य सरकारने दक्षिण आफ्रिका, बोत्स्वाना आणि झिम्बाब्वे हे तीन देश 'हाय रिस्क' म्हणून घोषित केले आहेत. या तीन देशांतून आलेल्यांना सात दिवसांचे संस्थात्मक विलगीकरण बंधनकारक केले आहे. मुंबई-पुण्यात आलेल्या परदेशी प्रवाशांशी संपर्क करण्यात येत असून, त्यांची चाचणी करण्याच्या सूचना देण्यात आल्या आहेत. राष्ट्रीय विषाणू विज्ञान संस्थेकडून (एनआयव्ही) या चाचणी अहवालाची तपासणी करून घेऊन चाचणी 'पॉझिटिव्ह' आल्यास 'एनआयव्ही'मध्येच जनुकीय क्रमनिर्धारण (जिनोमिक सिक्वेन्सिंग) केले जाणार आहे, असेही आरोग्य विभागातील सूत्रांनी सांगितले.

वाचा: पुण्याचे पाणी कमी करणाऱ्यांना पुणेकर पाणी पाजतील: फडणवीस