म. टा. प्रतिनिधी, पुणे
महाराष्ट्र राज्य परीक्षा परिषदेद्वारे घेण्यात येणारी पूर्व उच्च प्राथमिक शिष्यवृत्ती परीक्षा (इयत्ता पाचवी) व पूर्व माध्यमिक शिष्यवृत्ती परीक्षा (इयत्ता आठवी) नव्या वेळापत्रकानुसार रविवारी २४ फेब्रुवारी २०१९ रोजी होणार आहे, अशी माहिती परिषदेचे आयुक्त तुकाराम सुपे यांनी दिली. यापू्र्वी परिषदेने ही परीक्षा येत्या १७ फेब्रुवारी २०१९ रोजी घेण्याचे जाहीर केले होते; मात्र, या दिवशी महाराष्ट्र लोकसेवा आयोगातर्फे घेण्यात येणारी राज्यसेवा पूर्व परीक्षा होणार आहे. त्यामुळे एमपीएससी प्रशासनाने शिष्यवृत्ती परीक्षा अन्य दिवशी घेण्याची विनंती केली होती. परीक्षा परिषदेने ही विनंती मान्य करून परीक्षा २४ फेब्रुवारीला घेण्यात येणार आहे, अशी माहिती सुपे यांनी दिली. परीक्षेबाबत सविस्तर माहिती आणि अंतिम वेळापत्रक येत्या काही दिवसांत परिषदेच्या वेबसाइटवर जाहीर करण्यात येणार आहे, अशी माहिती परिषदेद्वारे देण्यात आली आहे.