टोमॅटो पुन्हा महागले

परतीच्या मान्सूनमुळे घटली आवक; साठ रुपयांनी किरकोळ विक्री

म. टा. प्रतिनिधी, पुणे

पुणे जिल्ह्यात सर्वदूर परतीच्या मान्सूनच्या पावसाचा कांद्यासह टोमॅटोला मोठा फटका बसला आहे. पावसामुळे टोमॅटोचे नुकसान झाल्याने मार्केट यार्डात होणारी आवक घटल्याने घाऊक बाजारात टोमॅटोच्या प्रतिकिलो दरात १० ते २० टक्क्यांनी वाढ झाली आहे. त्यामुळे किरकोळ बाजारात टोमॅटोचा दर प्रतिकिलो ५०ते ६० रुपयांवर पोहोचला आहे.
दिवाळीदरम्यान जिल्ह्यात परतीचा मान्सून सर्वदूर बरसला. त्याचा फटका जिल्ह्यातील कांद्याच्या पिकासह पालेभाज्यांना बसला. त्यामुळे गेल्या आठवड्यात मार्केट यार्डातील तरकारी विभागातील घाऊक बाजारात फळभाज्यांसह पालेभाज्याचे दर तेजीत होते. त्या वेळी कांदा ३० ते ३५ रुपये किलो दराने विकला जात होता, तर टोमॅटोची २० ते २५ रुपये दराने विक्री झाली.
‘जिल्ह्यात झालेल्या परतीच्या मान्सूनचा फळभाज्यांसह टोमॅटोला फटका बसला. परिणामी मार्केट यार्डात गुरुवारी टोमॅटोच्या साडेचार हजार पेट्यांची आवक झाली. त्यापैकी ५० ते ६० टक्के माल खराब झाला होता. पावसाचा फटका बसल्याने चांगल्या टोमॅटोची आवक घटल्याचे दिसून आले आहे. आवक घटल्याने टोमॅटोच्या दरात १० ते २० टक्क्यांची वाढ झाली आहे. गेल्या आठवड्यात दहा किलोसाठी २०० ते २५० रुपये दर होता. मात्र, परंतु, आवक मोठ्या प्रमाणावर घटल्याने घाऊक बाजारात टोमॅटोचे दर दहा किलोसाठी २५० ते ३०० रुपये दर मिळाला. म्हणजेच एका किलोसाठी २५ ते ३० रुपये दर मिळाला,’ अशी माहिती व्यापारी विलास भुजबळ यांनी दिली. दिवसभरात पुणे जिल्ह्यासह नगर, सातारा, सांगली, कोल्हापूर या भागातून टोमॅटोची आवक झाली.

परतीच्या मान्सूनच्या पावसाचा टोमॅटोला फटका बसल्याने मोठया प्रमाणात माल खराब झाला आहे. टोमॅटोला कीडही लागली आहे. त्यामुळे घाऊक बाजारात प्रतिकिलो ३० ते ३५ रुपयांपर्यंत दर मिळाले आहेत. हेच भाव किरकोळ बाजारात ५० ते ६० रुपये किलोपर्यंत पोहोचले आहेत.
प्रकाश ढमढेरे, व्यापारी