म. टा. प्रतिनिधी, पिंपरी
टिकटॉकवर महिलेने अपलोड केलेल्या व्हिडिओवर युवकांनी अश्लील कमेंट केली. तसेच मुलीच्या टिकटॉक व्हिडिओला अश्लिल गाणे लावले. या प्रकरणी पाच जणांवर विनयभंगाचे दोन गुन्हे दाखल करण्यात आले आहेत. सांगवी परिसरात एक जुलै २०१९ पासून वेळोवेळी ही घटना घडली आहे.
अक्षय साहेबराव म्हसे (रा. जुनी सांगवी), गोविंद पाटील (रा. हिंगोली), सत्यवान झांजे (रा. कात्रज, पुणे), रोहण कणसे (पूर्ण नाव, पत्ता माहिती नाही) आणि सूरज जाधव (रा. रहाटणी) अशी गुन्हा दाखल झालेल्या आरोपींची नावे आहेत. या प्रकरणी ४० वर्षीय महिलेने सांगवी पोलिस ठाण्यात फिर्याद दिली आहे. अक्षय याने एक जुलैपासून वेळोवेळी महिलेच्या टिकटॉक व व्हॉट्स अॅपवर आरोपी तरुणांनी अश्लील कमेंट केल्या. तसेच, महिलेला शिवीगाळ करून तिला मारहाण करण्याची धमकी दिली. अक्षयने महिलेचा मोबाइल क्रमांक त्याच्या काही मित्रांना दिला. त्याच्या मित्रांनीही पीडित महिलेला अश्लील मेसेज पाठवून मारहाण करण्याची धमकी दिली. त्यानंतर अक्षयने पीडित महिलेच्या मुलीचा फेक अकाउंट तयार करून त्यात मुलीने अपलोड केलेल्या टिकटॉकवर अश्लिल गाणे टाकले आणि तो व्हिडिओ अपलोड केला.
याचप्रमाणे वाकड येथे राहणाऱ्या आणखी एका २९ वर्षीय महिलेने अक्षय याच्या व्हिडिओवर कमेंट केली होती. त्यावर अक्षयने, 'तुझा पत्ता सापडला आहे. लवकरच माझी टीम घेऊन तुझ्या घरी येणार आहे,' अशी धमकी दिली. तसेच आरोपी गोविंद पाटील याने आपल्या टिकटॉक अकाउंटवरून पीडितेला जीवे मारण्याची धमकी दिली. याबाबत गुन्हा दाखल करण्यात आला असून, सांगवी पोलिस तपास करीत आहेत.