हडपसरमध्ये अपघातात एक ठार

ट्रकला टेम्पोची मागून धडक; तीन तास वाहतूक कोंडी

म. टा. प्रतिनिधी, हडपसर

पुणे-सोलापूर रोड पंधरा नंबर मांजरी फाटा येथे सिग्नलला थांबलेल्या ट्रकला मागून आयशर टेम्पोची धडक बसल्याने भीषण अपघात होऊन टेम्पोचालक जागीच ठार झाला. चालक केबिनमध्ये अडकल्याने बाहेर काढण्यासाठी तब्बल दीड तास वेळ लागला. अपघातात किन्नरही गंभीर जखमी झाला असून त्याला उपचारासाठी रुग्णालयात दाखल केले आहे. हा अपघात सोमवारी रात्री अकरा वाजण्याच्या सुमारास झाला. यादरम्यान सोलापूर रस्त्यावर तीन तास वाहतूक कोंडी झाली होती.

मुबारक साहेबकिरा जहागिरदार (वय ५० रा. करमाळा, बार्शी, जि. सोलापूर) असे अपघातात मृत्युमुखी पडलेल्या टेम्पोचालकाचे नाव आहे. आबासाहेब विश्वंभर चौधरी (वय ३८, रा. लातूर जि. उस्मानाबाद) असे जखमी झालेल्या किन्नरचे नाव आहे. सोमवारी रात्री पावणेअकरा वाजता पंधरा नंबर सिग्नल चौकात सोलापूरच्या दिशेने जाणार ट्रक थांबला होता. त्या वेळी अचानक ट्रकच्या मागून मोठा आवाज झाला. टेम्पोची जोरात धडक ट्रकला बसली होती. यामध्ये टेम्पोच्या केबिनचा भाग पूर्ण आत दबला होता. चालकाचे संपूर्ण शरीर केबिनमध्ये अडकले होते. हडपसर अग्निशामक दलाच्या जवानांनी त्याला बाहेर काढण्याचे प्रयत्न केले. मात्र, केबिन चा लोखंडी पत्रा खूप आत गेल्याने तो ओढला जात नव्हता. या वेळी नागरिकांनीही मदत केली. अखेर पोलिसांनी क्रेनला बोलावून घेतले. क्रेनच्या साह्याने केबिनचा पत्रा काढण्यात आला. त्यानंतर अडकलेल्या टेम्पोचालकास बाहेर काढण्यास यश आले. जखमी चौधरीला अगोदरच बाहेर काढले होते. त्याच्या हाताला, पायाला गंभीर मार लागल्याने रुग्णालयात दाखल केले. यामध्ये हडपसर पोलिस, अग्निशामक दलाचे जवान व नागरिक हितेश घाडगे, प्रताप उबाळे, बाळासाहेब शिंदे, सचिन मोरेंसह अनेक नागरिकांनी मदत कार्यात सहभाग घेतला होता.