खरेदीच्या बहाण्याने पावणेदोन लाख चोरले

म. टा. प्रतिनिधी, पुणे

सहकारनगर परिसरातील एका दुकानात छत्री खरेदीच्या बहाण्याने आलेल्या तिघांनी दुकानदाराला बोलण्यात गुंतवूण पावणेदोन लाख रुपयांची रोकड चोरल्याची घटना समोर आली आहे. या प्रकरणी दत्तवाडी पोलिस ठाण्यात गुन्हा दाखल करण्यात आला.

याबाबत महेंद्र आचलराम चौधरी (वय २१, रा. धनकवडी) यांनी तक्रार दिली. त्यानुसार तीन अनोळखी व्यक्तींच्या विरोधात चोरीचा गुन्हा दाखल करण्यात आला आहे. पोलिसांनी दिलेल्या माहितीनुसार, तक्ररादार यांचे सहकारनगर नंबर दोनमध्ये 'तुलसी व्हरायटी' नावाचे दुकान आहे. रविवारी दुपारी सव्वा तीनच्या सुमारास तीन व्यक्ती दुकानात छत्री खरेदीच्या बहाण्याने आल्या. त्यातील दोन व्यक्तींनी तक्रारदार चौधरी यांना छत्री घेण्यासाठी बोलण्यात गुंतवूण ठेवले. तिसऱ्या व्यक्तीने त्यांची नजर चुकवून गल्ल्यातील एक लाख ६५ हजार रुपये रोख, एका जिन्सच्या कपड्यात ठेवलेले आधारकार्ड, पॅन कार्ड, एटीएम कार्ड, वाहन चालविण्याचा परवाना असे साहित्य चोरून नेले.

आरोपी गेल्यानंतर चौधरी दुकानात गेले. त्यांनी गल्ला पाहिला. त्या वेळी त्यामध्ये रोकड व त्यांचे इतर साहित्य आढळले नाही. त्या वेळी त्यांना चोरीचा प्रकार समजला. त्यांनी बाहेर येऊन पाहिले. पण, तोपर्यंत आरोपी पसार झाले होते. दुकानात सीसीटीव्ही नसल्यामुळे आरोपींची माहिती मिळू शकली नाही. या प्रकरणी दत्तवाडी पोलिस अधिक तपास करत आहेत.

आरोपीच्या तोंडाला मास्क

आरोपी दुकानात आल्यानंतर त्यांच्या तोंडाला मास्क लावलेले होते. त्यामुळे त्यांचे चेहरे व्यवस्थित दिसले नाहीत. त्या दोघांचे वय साधारण २० ते २५ वयोगटतील असेल. एका आरोपीने हातावर गोंदलेले होते. तिसऱ्या आरोपीच्या डोक्याला टोपी होती. मास्कमुळे चेहरा स्पष्ट दिसू शकत नव्हता.