म. टा. प्रतिनिधी, पुणे
राज्य राखीव पोलिस दलाच्या (एसआरपीएफ) गट क्रमांक-२ च्या भरती परीक्षेतील गैरप्रकारात गेल्या वर्षभरापासून फरारी असलेल्या महाविद्यालयीन विद्यार्थ्याला गुन्हे शाखेच्या पोलिसांनी अटक केली. तेजस राजेंद्र नेमाडे (वय २३, सध्या रा. उमेद अपार्टमेंट, सिंहगड रस्ता, मूळ रा. गोयंकानगर, मूर्तीजापूर, जि. अकोला) असे अटक केलेल्याचे नाव आहे. 'एसआरपीएफ'च्या भरती प्रक्रियेतील लेखी परीक्षेत उत्तरपत्रिका तपासणीचे काम एका खासगी संस्थेला देण्यात आले होते. या कंपनीतील काही जण आणि 'एसआरपीएफ'मधील दोन कर्मचाऱ्यांनी संगनमत करून उत्तरपत्रिकेत फेरफार केले होते. काही उमेदवारांना अतिरिक्त गुण देण्यात आले होते. हे प्रकरण उघडकीस आल्यानंतर वानवडी पोलिस ठाण्यात गुन्हा दाखल करण्यात आला होता. तेव्हा काही जणांना अटक झाली होती. गुन्हे शाखेच्या युनिट पाचचे वरिष्ठ पोलिस निरीक्षक दत्ता चव्हाण, सहायक निरीक्षक भालचंद्र ढवळे, उपनिरीक्षक शेंडगे, लक्ष्मण शिंदे, संतोष मोहिते, समीर शेख आदींनी सापळा लावून नेमाडेला अमरावतीतून ताब्यात घेतले.
..............