म. टा. प्रतिनिधी, पिंपरी
'पंतप्रधान आवास योजनेंतर्गत पिंपरी-चिंचवड महापालिकेच्या वतीने पब्लिक प्रायव्हेट पार्टनरशिप (पीपीपी) तत्त्वावर एक हजार १६९ घरे उभारण्यात येतील,' अशी माहिती महापौर राहुल जाधव यांनी नुकतीच दिली.
पंतप्रधान आवास योजनेंतर्गत 'पीपीपी' तत्त्वावरील राज्यातील पहिलाच प्रकल्प असल्याचा दावा करून जाधव म्हणाले, 'चिखली जाधववाडी येथील देहू-आळंदी रस्ता या ठिकाणी गृहप्रकल्प उभारण्यात येणार आहे. त्या माध्यमातून शहरातील दारिद्र्यरेषेखालील नागरिकांना लाभ मिळणार आहे. त्यांचे स्वत:च्या हक्काच्या घराचे स्वप्न पूर्ण होणार आहे.'
पंतप्रधान आवास योजनेंतर्गत शहरात विविध दहा ठिकाणी प्रकल्प होणार आहेत. त्यासाठी खासगी विकसकांचीही मदत घेण्यात येणार आहे. त्या अनुषंगाने महापालिकेने निविदा प्रक्रिया राबविली. त्यामध्ये ऐश्वर्यम संस्थेने पुढाकार घेतला. त्यानुसार गृहप्रकल्पातील ३५ टक्के सदनिका 'ईडब्ल्यूएस व एलआयई' गटासाठी देण्यात येणार आहेत. 'घरांच्या संदर्भातील अर्ज छाननी प्रक्रिया पालिकेच्या वतीने केली जाणार आहे. त्यानंतर योग्य पद्धतीने घरांचे वाटप केले जाईल. चऱ्होली, रावेत, किवळे, आकुर्डी येथील प्रकल्पाची कामे चालू असून, ती मुदतीत पूर्ण केली जातील,' असे आयुक्त श्रावण हर्डीकर यांनी स्पष्ट केले.
याबाबत ऐश्वर्यमचे संचालक सतीश अग्रवाल, दीपक माने यांनी करार केला आहे. 'केंद्र सरकारने निश्चित केलेल्या दरानुसार सदनिका उपलब्ध होणार आहेत. लाभार्थींना अनुदानही मिळणार आहे. या संदर्भातील मागणी अर्ज पालिकेच्या कार्यालयात उपलब्ध होणार आहेत,' असे अग्रवाल यांनी सांगितले.