म. टा. प्रतिनिधी, पुणे
'पुणे प्लॅटफॉर्म फॉर कोव्हिड १९ रिस्पॉन्स' अर्थात 'पीपीसीआर'तर्फे करोनाविरोधातील लढ्यासाठी एक हजार पल्स ऑक्सिमीटर उपलब्ध करून देण्यात आले आहेत. या माध्यमातून पुणे महापालिका, पिंपरी-चिंचवड महापालिका; तसेच 'कोविड १९'साठी निर्धारित हॉस्पिटलमध्ये करोनापूर्व चाचणी केली जाणार आहे.
पल्स ऑक्सिमीटर हे छोटेसे इलेक्ट्रॉनिक उपकरण आहे. चिमट्यासारखे हे उपकरण रुग्णाच्या बोटाला लावले जाते. त्यातून रुग्णाच्या रक्तातील ऑक्सिजनचे प्रमाण कळते. बोट, कपाळ, नाक, पाय, कान अथवा तळपायालाही हे उपकरण लावता येते. त्यामुळे घरोघर जाऊन केल्या जाणाऱ्या सर्वेक्षणासाठी हे उपकरण अत्यंत उपयुक्त आहे. ज्यांच्या रक्तातील ऑक्सिजनची पातळी ९३ टक्क्यांपेक्षा कमी आहे, अशांना पुढील चाचणीसाठी पाठवले जाते. करोनाबाधित रुग्णांमध्ये रक्तातील ऑक्सिजन पातळी कमी झाल्याचे आढळते. ही करोनाची खात्रीशीर चाचणी नसली, तरी त्यातून ज्यांच्या रक्तातील ऑक्सिजनची पातळी कमी आहे, असे रुग्ण वेगळे काढता येतात. करोनाबाधितांची वाढती संख्या पाहता घरोघर सर्वेक्षण करण्यात येत आहे. त्यासाठी तसेच क्वारंटाइन सेंटरमधील रुग्णांमधून अतिदक्षतेची गरज असलेल्या रुग्णांचे वर्गीकरण करण्यासाठी हे ऑक्सिमीटर उपयुक्त ठरतील, असे जिल्हाधिकारी नवलकिशोर राम यांनी सांगितले.
पीपीसीआर हा पुण्यातील उद्योजक, व्यावसायिक, एमसीसीआयए, संशोधक, डॉक्टर आणि नागरिकांचा संयुक्त उपक्रम आहे. त्यामार्फत पुण्याची आरोग्यव्यवस्था सक्षम केली जात आहे. करोनाच्या ७० टक्के रुग्णांमध्ये कोणतीही लक्षणे आढळत नाहीत. त्यामुळे करोनाचा संसर्ग आटोक्यात ठेवण्यासाठी घरोघर जाऊन सर्वेक्षण करणे महत्त्वाचे ठरेल. त्यासाठी पल्स ऑक्सिमीटर उपयुक्त आहे. त्यामुळे सरसकट सर्वांसाठी करोना टेस्टिंग किट्सचा वापर करावा लागणार नाही, असे पीपीसीआरचे समन्वयक व प्रमुख सुधीर मेहता यांनी सांगितले.