पहिल्या फेरीत सहा हजार प्रवेश

म. टा. प्रतिनिधी, पुणे

अकरावी ऑनलाइन प्रवेश प्रक्रियेच्या पहिल्या विशेष फेरीत ज्युनियर कॉलेजांमध्ये एकूण ६ हजार ६६२ विद्यार्थ्यांना प्रवेश देण्यात आले आहेत. त्यापैकी ४ हजार ६४५ विद्यार्थ्यांना पहिल्या पसंतीचे कॉलेज मिळाले असल्याने त्यांना प्रवेश घ्यावा लागणार आहे. या फेरीत कॉलेजांमध्ये प्रवेश मिळालेल्या सर्व विद्यार्थ्यांना १८ ते १९ ऑगस्ट दरम्यान कॉलेजांमध्ये शुल्क भरून प्रवेश घ्यायचा आहे. दरम्यान, या फेरीतून १ हजार ५९ विद्यार्थ्यांना अद्याप प्रवेश मिळालेले नाही.

केंद्रीय प्रवेश नियंत्रण समितीद्वारे पुणे आणि पिंपरी चिंचवड शहरांमधील २६७ ज्युनियर कॉलेजांमध्ये विद्यार्थ्यांना सायन्स, आर्टस्, कॉमर्स, बायोफोकल विद्याशाखांमध्ये प्रवेश घेण्यासाठी प्रवेश प्रक्रिया राबविण्यात येत आहे. प्रवेश प्रक्रियेच्या नियमित चार फेऱ्या झाल्यानंतर देखील काही विद्यार्थ्यांना कॉलेजांमध्ये अद्याप प्रवेश मिळालेले नाही. त्यामुळे समितीद्वारे विशेष फेऱ्या घेण्यात येत आहे. त्यानुसार पहिल्या विशेष फेरीची प्रवेशाची गुणवत्ता यादी बुधवारी सायंकाळी जाहीर करण्यात आली. त्यानुसार ६ हजार ६६२ विद्यार्थ्यांना प्रवेश देण्यात आले आहेत. या फेरीसाठी एकूण ७ हजार ७२१ विद्यार्थ्यांनी नोंदणी केली होती. या फेरीतून प्रवेश मिळालेल्या विद्यार्थ्यांना १८ ते १९ ऑगस्ट दरम्यान कॉलेजांमध्ये सका‍ळी दहा ते सायंकाळी पाच या वेळेत शुल्क भरून प्रवेश घ्यायचा आहे.

प्रवेशाच्या विशेष फेऱ्या

पूर्ण शुल्क भरण्यासाठी कॉलेजांनी सक्ती करू नये, अशा सूचना समितीद्वारे देण्यात आल्या आहेत. समितीद्वारे अद्याप अकरावीला प्रवेश न मिळालेल्या विद्यार्थ्यांसाठी आणखी काही प्रवेशाच्या विशेष फेऱ्या घेण्याची शक्यता आहे. अधिक माहितीसाठी विद्यार्थ्यांनी www.pune11thadmission.net या वेबसाइटवर संपर्क साधावा, अशी माहिती समितीच्या सचिव मीनाक्षी राऊत यांनी दिली.