विद्यार्थिनीला पुन्हा ‘दृष्टी’

‘नेत्रपटला’च्या आजारावर यशस्वी शस्त्रक्रिया

म. टा. प्रतिनिधी, पुणे
दहावीच्या परीक्षेदरम्यान डोळ्यांच्या नेत्रपटलाला सूच आल्यामुळे (रेटिनल व्हॅस्क्युलिटीज) तिची दृष्टी गेली होती. त्यामुळे उपचार सुरू ठेवून रायटरच्या मदतीने परीक्षा दिल्यानंतर गेलेली दृष्टी ‘मायक्रो इन्सिजन व्हेटरिओ रेटिना’ या प्रकारच्या ऑपरेशनद्वारे (एमआयव्हीएस) पुन्हा प्राप्त करता आली. यामुळे आता त्या विद्यार्थिनीला अकरावीला प्रवेश घेणे शक्य झाले.

‘निगडी येथील दहावीतील विद्यार्थिनी सलोनी मोरे हिला परीक्षा सुरू असताना अस्पष्ट दिसू लागले. त्या वेळी तिने राष्ट्रीय नेत्रचिकित्सा हॉस्पिटलमध्ये (एनआयओ) आमच्याशी संपर्क साधला. डोळ्यांची तपासणी केली. त्या वेळी तिच्या दोन्ही डोळ्यांच्या पडद्याच्या रक्तवाहिन्यांमध्ये सूज आल्याने रेटिनल व्हॅस्क्युलिटिजचा आजार झाल्याचे आढळले. एका विषयाचा पेपर झाल्यानंतर तिला दिसेनासे झाले होते. उत्तरपत्रिकेत काय लिहिते हे कळत नव्हते. तिला स्टेरॉड्स देण्यात आले. रायटरच्या मदतीने तिने सर्व पेपर लिहिले. परीक्षेनंतर तिच्या दोन्ही डोळ्यांवर ‘एमआयव्हीएस’ची सर्जरी करण्याचा निर्णय घेण्यात आला. सर्जरीनंतर तिला दोन्ही डोळ्यांना पूर्वीप्रमाणे दिसू लागले. तिला दृष्टी प्राप्त झाली,’ अशी माहिती राष्ट्रीय नेत्रचिकित्सा संस्थेचे नेत्रतज्ज्ञ डॉ. आदित्य केळकर यांनी दिली.

डॉ. केळकर यांच्यासह डॉ. हेतल मेहता-खांडगे, डॉ. अक्षय कोठारी यांनी हे ऑपरेशन यशस्वी केले. सलोनी मोरे म्हणाली, ‘दहावीची परीक्षा देताना मला अचानकपणे डोळ्यांना दिसेनासे झाले होते. परंतु, डॉक्टरांसह शाळेच्या शिक्षकांनी मला धीर दिला. रायटरच्या मदतीने पेपर दिले. त्यानंतर दोन्ही डोळ्यांचे ऑपरेशन झाले. आता पूर्वीसारखे दिसू लागल्याचे समाधान आहे.’