पुणे : अभियांत्रिकीसाठी घेतली जाणारी 'सीईटी' ही प्रवेशपरीक्षा गेल्या वर्षीपासून ऑनलाइन पद्धतीने घेण्यात येत आहे. विद्यार्थ्यांना या पद्धतीचा सराव करता यावा यासाठी लवळे येथील भारती विद्यापीठ अभियांत्रिकी महाविद्यालयाने सराव परीक्षा वेबसाइटची निर्मिती केली आहे. 'अनुभवी प्राध्यापकांच्या मार्गदर्शनाखाली व 'सीईटी'ने निर्धारित केलेल्या आकृतीबंधानुसार प्रश्नसंच आणि वेबसाइटची सुधारित आवृत्ती तयार केली आहे. कॉलेजच्या bvcoe.bharatividyapeeth.edu वेबसाइटवर कोणताही विद्यार्थी मोफत नोंदणी करून सराव करू शकतो,' असे आवाहन महाविद्यालयाचे प्राचार्य डॉ. आर. एन. पाटील यांनी केले आहे.
गेल्या वर्षी सुमारे सात हजार विद्यार्थ्यांनी या उपक्रमाचा फायदा घेतला होता. संस्थेचे कार्यवाह डॉ. विश्वजित कदम यांच्या मार्गदर्शनाखाली गतवर्षी या वेबसाइटची निर्मिती करण्यात आली. वेबसाइटची निर्मिती करण्यासाठी प्रा. अविनाश इंगोले, प्रा. संकेत पवार, अभिजित कदम आदींनी परिश्रम घेतले.